“O‘zbekiston havo yo‘llari” aeroportlarida o‘quv mashg‘ulotlari o‘tkazilmoqda

“O‘zbekiston havo yo‘llari” milliy aviakompaniyasi aeroportlari va bo‘linmalarida parvozlarni qidiruv va avariya-qutqaruv ta’minoti bo‘yicha kompleks o‘quv mashqlari o‘tkazilmoqda. Bu haqda MAK matbuot xizmati xabar berdi.

Kompleks mashg‘ulotlar “Aerodrom hududida halokatga uchrayotgan havo kemasi yo‘lovchilari va ekipajiga hamkorlikdagi kuchlar va shahar vositalarini jalb qilish bilan yordam ko‘rsatish” mavzusida o‘tkazilmoqda.

Unda aeroportning avariya-qutqaruv jamoasi va hamkorlikdagi kuchlarni ogohlantirish, sun’iy uchish-qo‘nish yo‘lagiga havo-mexanik ko‘pigini sepish, halokatga uchragan havo kemasini kutib olish uchun o‘t o‘chirish mashinalarini yo‘lak bo‘ylab joylashtirish masalalari o‘rganildi.

Mashqlar chog‘ida obyektlardagi yong‘inga qarshi holatlar ham o‘rganildi.