Bugun Rossiya prezidenti bilan o‘tkazilgan to‘g‘ridan-to‘g‘ri muloqot chog‘ida AQSh Markaziy razvedka boshqarmasi sobiq xodimi Edvard Snouden ingliz tilida videosavol bilan murojaat qildi. Bu haqda “RIA Novosti” xabar berdi.
Snoudenning “Rossiya millionlab kishilarning suhbatlarini tinglash, saqlash va tahlil qilish bilan shug‘ullanadimi va prezident ommaviy nazoratni adolatli va o‘rinli deb hisoblaydimi?” — degan savoliga Putin Rossiya maxsus xizmati tinglash va kuzatish vositalaridan sud sanksiyasi bilan qonunga muvofiq foydalanishini ta’kidladi.
“Sud orqali alohida shaxsni kuzatish haqida ruxsat olish talab etiladi. Qonun bo‘yicha, ommaviy kuzatish haqida gap ham bo‘lishi mumkin emas”, — dedi Putin.
Eslatib o‘tamiz, Snouden 2013-yili AQSh va Britaniya maxsus xizmatlarining noqonuniy faoliyati haqida Washington Post va Guardian nashrlariga axborot bergan edi. MXAning so‘zlariga ko‘ra, jurnalistlar ixtiyoriga ana shunday ma’lumotlardan 200 mingtasi kelib tushgan bo‘lishi mumkin. Aynan shundan so‘ng Snouden Gongkongga uchib ketgan. O‘tgan yilning 23-iyunida esa Moskvadagi “Sheremetyevo” aeroportining tranzit hududida qo‘nim topgan. 2013-yilning avgustida u Rossiyada 1 yil muddatga vaqtinchalik joylashgan edi.
Izoh (0)