Avval xabar qilganimizdek, 22—30-mart kunlari Navoiy viloyatida “Salomatlik” an’anaviy poyezdi ish olib bordi. “Do‘stlik bayrog‘i” gazetasining xabar berishicha, poytaxtdan tashrif buyurgan shifokorlar bilan birgalikda, navoiylik tibbiyot xodimlari ham 1937 nafar kattalar va bolalarni tibbiy ko‘rikdan o‘tkazdi.
664 xotin-qiz, 18 nogiron va 80 nafaqaxo‘r ko‘rik bilan birga zaruriy konsultatsiyalarga ega bo‘ldi. Olis qishloq joylarning 805 nafar aholisi ultratovushli tekshiruvdan, 348 nafari elektrokardiografiya tekshiruvidan o‘tdi.
Bundan tashqari, kam ta’minlangan oilalarga dori-darmon, kiyim-kechak, gigiyena vositalari, oziq-ovqat mahsulotlari ko‘rinishida gumanitar yordam berildi. Bunday ko‘mak “Sog‘lom avlod uchun” Navoiy viloyat jamg‘armasi tomonidan 2600 kishiga taqdim etildi.
Poyezd ishida viloyatdagi 46 tashkilot, shu jumladan, “Mahalla” jamg‘armasi, Xotin-qizlar qo‘mitasi, internatlar ishtirok etdi.
Izoh (0)