UFC’нинг ўрта вазн тоифасидаги амалдаги чемпиони Шон Стрикленд АҚШдаги давлат назорати ва фуқароларнинг доимий кузатув остида эканлигидан норозилигини билдирди. У мамлакатдаги сиёсий вазиятни фақатгина инқилоб орқали ўзгартириш мумкинлигини таъкидлади.
“Раҳбарларимизнинг хатти-ҳаракатларидан уяламан. Тасаввур қилинг, агар давлатимиз асосчилари ҳозирги умумий кузатув тизими, ҳар қадамдаги камералар ва Миллий хавфсизлик агентлиги фаолиятини кўрганида нима бўларди? Мамлакатда инқилоб бўлиши шарт. Вазиятни фақат шу нарса изига тушира олади”.
Бу жангчининг биринчи шов-шувли баёноти эмас. У 2023-йилда ҳам аёлларни сайлов ҳуқуқидан маҳрум қилиш кераклигини айтиб, жамоатчилик эътирозларига сабаб бўлган эди.
Сиёсий қарашлари сабабли Стрикленд кўпинча можаролар марказида қолади. 2026-йилнинг июнь ойида у Оқ уй ҳудудида ўтказилган тадбир вақтида ҳуқуқ-тартибот идоралари томонидан ҳибсга олинган эди. Спортчининг таъкидлашича, унга президент Дональд Трампни танқид қилгани учун ушбу тадбирда қатнашиш тақиқланган. Бироқ UFC раҳбари Дана Уайт унга ҳеч қандай тақиқ қўйилмаганини, шунчаки таклифнома берилмаганини маълум қилган.
Бунга қарамай, Стрикленд тадбирга яширинча кириб бориб, кутилмаганда октагонга чиқиб олган. Шундан сўнг хавфсизлик хизмати ва полиция ходимлари уни ҳудуддан олиб чиқиб, машинасига ўтқазиб, ҳибсхонага олиб кетган. Кейинчалик унга жамоат тартибини бузиш айблови эълон қилинган. Жангчининг ўзи эса сиёсатчилар устидан кулгани учун қасддан нишонга олинганини иддао қилиб келади.
Маълумот учун, Стрикленд профессионал MMA’да 38 та жанг ўтказиб, 31 марта ғалаба қозонган ва 7 бор мағлубиятга учраган. Ўзининг сўнгги жангини жорий йилнинг май ойида Ҳамзат Чимаевга қарши ўтказди. Ушбу жангда ҳакамларнинг қарори билан ғалаба қозонган Стрикленд ўрта вазн тоифасидаги чемпионлик камарини ўзига қайтариб олди.
