UFC ўрта вазн тоифаси чемпиони Шон Стрикленд ва собиқ чемпион Ҳамзат Чимаев ўртасидаги реванш жанги америкалик спортчининг соғлиғи билан боғлиқ муаммолар сабаб кейинроқ муддатга қолдирилиши мумкин. Бу ҳақда Чимаев жамоаси ТАСС нашрига маълум қилган.
Аввалроқ Чимаев октябрь ойида Абу-Дабида ўтадиган UFC турнирида Стриклендга қарши реванш жангини сўрагани ҳақида хабарлар тарқалган эди. Биринчи тўқнашувда Чимаев ҳакамларнинг бўлинган қарорига кўра мағлуб бўлиб, ўрта вазн тоифасидаги чемпионлик камарини бой берган ва фаолиятида илк бор мағлубиятга учраган эди.
“Жанг кейинроқ муддатга сурилиши мумкин. Стриклендда кўплаб жароҳатлар борлигини кўрдик”, дейди Чимаев жамоаси вакили.
Маълумот учун, 32 ёшли Ҳамзат Чимаев профессионал MMA’даги илк мағлубиятини айнан ушбу жангда қабул қилиб олди. Унинг ҳисобида, шунингдек, 15 та ғалаба мавжуд. Чимаев 2025 йил август ойида жанубий африкалик Дрикус дю Плессини мағлуб этиб, UFC чемпионлик камарини қўлга киритганди.
35 ёшли Стрикленднинг рекорди эса 31 та ғалаба ва 7 та мағлубиятдан иборат.
1994 йилда туғилган Чимаев 2020 йилда UFC’да дебют қилган ҳамда 66 кун ичида 3 та жанг ўтказиб, ўзига хос рекорд қайд этган. 2021 йил март ойида спортчи коронавирус асоратлари сабабли фаолиятини якунлашини эълон қилган эди. Ўшанда спортчига саратон ташхиси қўйилгани ҳақида хабарлар тарқалган, бироқ қайта текширувлардан сўнг хавфли касаллик аниқланмаган ва Ҳамзат октагонга қайтган.
У ҳозирга қадар Жералд Мёршарт, Ли Жинглиан, Гилберт Бёрнс, Кевин Холланд, Камару Усман, Роберт Уиттакер ва Дрикус дю Плесси каби номдор жангчиларни мағлуб этган.
