UFC’нинг ўрта вазн тоифаси (84 кг) чемпиони, 31 ёшли мағлубияциз жангчи Ҳамзат Чимаев ўз чемпионлик камарини Шон Стрикленддан ҳимоя қилади. Жанг 9 май куни АҚШнинг Нью-Жерси штати, Ньюарк шаҳрида бўлиб ўтадиган UFC 328 турнири доирасида ўтказилади.
Қайд этилишича, UFC ушбу беллашув ҳақида яқин вақт ичида расман эълон қилади. Мазкур турнир доирасида, шунингдек, ўзбекистонлик Богдан Гусков собиқ чемпион Ян Блаховичга қарши октагонга чиқиши кутилмоқда.
Ҳамзат Чимаев 2025 йил 17 август куни Чикаго шаҳрида ўтказилган UFC 319 турнирида жанубий африкалик Дрикус дю Плесси устидан ғалаба қозониб, чемпионлик камарини қўлга киритган эди. Шу тариқа, Чимаев UFC тарихида мағлубияциз чемпионликка эришган 16-жангчига айланди. У MMA’даги профессионал фаолияти давомида 15 та жанг ўтказиб, уларнинг барчасида ғалаба қозонган.
1994 йилда туғилган Чимаев 2020 йилда UFC’да дебют қилган ҳамда 66 кун ичида 3 та жанг ўтказиб, ўзига хос рекорд қайд этган. 2021 йил март ойида спортчи коронавирус асоратлари сабабли фаолиятини якунлашини эълон қилган эди. Ўшанда спортчига саратон ташхиси қўйилгани ҳақида хабарлар тарқалган, бироқ қайта текширувлардан сўнг хавфли касаллик аниқланмаган ва Ҳамзат октагонга қайтган.
У ҳозирга қадар Жералд Мёршарт, Ли Жинглиан, Гилберт Бёрнс, Кевин Холланд, Камару Усман, Роберт Уиттакер ва Дрикус дю Плесси каби номдор жангчиларни мағлуб этган.
Шон Стрикленд MMA’даги фаолияти давомида 37 та жанг ўтказиб, 30 та ғалаба ва 7 та мағлубият қайд этган. 35 ёшли америкалик жангчи ушбу вазн тоифасининг собиқ чемпиони ҳисобланади.
