Белградда Шавкат Мирзиёевни Сербиянинг олий давлат мукофоти — Катта занжирли Сербия Республикаси ордени билан тақдирлаш маросими бўлиб ўтди. Орденни Сербия президенти Александр Вучич топширди.
Мукофот давлат раҳбарига Ўзбекистон ва Сербия ўртасидаги кўп қиррали муносабатларни мустаҳкамлашга қўшган ҳиссаси учун берилди. Шавкат Мирзиёев юксак мукофот учун миннатдорлик билдириб, уни Сербия халқининг Ўзбекистонга бўлган ҳурмати, икки давлат ўртасидаги дўстлик ва муносабатларни ривожлантиришга интилиш рамзи сифатида баҳолади.
Сербия Республикаси ордени хорижий давлатларнинг таниқли арбобларига халқлар ўртасида тинчлик, ҳамкорлик ва ўзаро англашувни мустаҳкамлаш, шунингдек, Сербия билан дўстона алоқаларни ривожлантиришга қўшган ҳиссаси учун берилади.
Эслатиб ўтамиз, 8 сентябрь куни Белград шаҳридаги музокаралар якунида Шавкат Мирзиёев ва Сербия президенти Александр Вучич икки давлат ўртасида стратегик шериклик муносабатларини ўрнатиш тўғрисидаги қўшма декларация имзоланганди.
