Францияда ўғрилар Ренуар музейидан қиймати 9 миллион еврога тенг бўлган учта расмни ўғирлаб кетди. Бу ҳақда Кан-Сюр-Мер шаҳри мэри Брайан Массонга таяниб ABC News хабар берди.
Икки нафар ўғри 8 сентябрь куни француз импрессионист рассоми Пер-Огюст Ренуарга бағишланган музейга бостириб кирган. Улар тўртта санъат асарини ўғирлаган, аммо биттасини қочиб кетаётганда тушириб қолдирган.
Маҳаллий Nice-Matin газетаси ўғирланган расмлар Мадам Пичон портрети (1895), Мадам Colonna Romano портрети (1910), Coco Lisant (1905) ва Jeune fille au puits (1886) эканини айтмоқда. Шаҳар мэрияси ўғирланган асарларнинг қийматини 9 миллион еврога (14,5 миллион доллар) баҳолаган.
“Шаҳарнинг видеокузатув камераларига тушган икки киши қочиш чоғида расмлардан бирини ташлаб кетган”, деди Брайан Массон.
Музей сигнализацияси соат 5:48 да ишга тушган. Атиги беш дақиқадан сўнг шаҳар полицияси воқеа жойига етиб келган. Гумондорлар қидирилмоқда, тергов давом этмоқда.
Ренуар музейи 1960 йилда рассомнинг 1919 йилги вафотидан олдин яшаган уйида ташкил этилган. Унинг коллекциясида Ренуарга тегишли бўлган буюмлар ва мебеллар, жумладан, унинг молберти, ногиронлар аравачаси, рассом томонидан чизилган портретлар, пейзажлар ва нюд суратлар мавжуд.
Европада санъат асарларини ўғирлаш ҳолатлари
Юқоридаги ўғирлик Париждаги Лувр музейидан кундузи тахминан 88 миллион евро қийматидаги заргарлик буюмлари ўғирланганидан бир йил ўтмай содир бўлди. Луврни талон-торож қилишда гумонланган тўрт киши ушланган. Бироқ халқаро ҳамкорликка қарамай, ўғирланган буюмлар ҳали ҳам топилмаган.
Март ойида Италиядаги музейдан Пьер-Огюст Ренуар, Пол Сезанн ва Анри Матисснинг учта асари ўғирлаб кетилганди. Икки ой ўтиб, картиналар гумондорлардан бирининг уйидан топилган. Улар топилганидан бир неча кун ўтиб, Италиядаги бошқа бир музейдан яна тўртта картина ўғирлаб кетилганди.
