Франция пойтахти Париждаги машҳур Лувр музейининг Аполлон галереяси 22 июль куни қайта очилди. 2025-йилнинг кузида бу ерда шов-шувли ўғрилик юз бериб, кўргазма номаълум муддатда ёпилганди.
Таъкидланишича, илгари француз қироллик оиласининг қимматбаҳо буюмлари ва жавоҳирлари сақланган галерея энди мутлақо бўш. 2025 йилнинг 19 октябрида тўрт нафар ўғри галереядан 102 миллион долларлик тақинчоқларни ўғирлаган. Улар орасида Франция императрицаси Евгенияга тегишли олтин, олмос ва зумрадлар билан безатилган тож ҳам бор эди.
Лувр пресс-релизига кўра, девордаги расм ва ҳайкалтарошлик безакларини ўз ҳолига қайтариш учун галереядаги барча экспонатлар ва витриналар олиб ташланган. Баёнотда айтилишича, буюмларнинг олиб чиқилиши галереяга ўзининг асл улуғворлигини қайтаради. Чунки бу маскан XVII асрда ўз-ўзича алоҳида санъат асари сифатида яратилган эди.
Ўғирланган жавоҳирлар ҳали ҳам топилмади. Фақат Евгениянинг тожи бундан мустасно. Ўғрилар қочиб кетаётганда уни музей ташқарисида тушириб қолдирган ва тож топиб олинган. Лувр музейи президенти Кристоф Лерибо Le Parisien нашрига берган интервьюсида ўғирланмай қолган заргарлик буюмлари ҳақида гапирди. Улар музейнинг бошқа қисмида ташкил этиладиган ойна ва деразасиз, хавфсиз сақлаш хонасига жойлаштирилади.
Аполлон галереяси дастлаб бундан 350 йилдан кўпроқ вақт олдин Франция қироли Людовик ХIV учун қабулхоналар зали сифатида қурилган. Делакруа ва Ле Брен каби таниқли рассомлар томонидан безатилган бу галерея Версал саройидаги Кўзгулар зали учун намуна бўлган.
“Бу безаклар, расмлар ва гобеленларга бой Луврнинг энг машҳур жойларидан биридир”, дейилади пресс-релизда.
Октябрь ойидаги ўғрилик бутун дунё эътиборига тушди. Мамлакат бўйлаб жиноятчиларни қидириш операциясини бошлаб юборилди. Ўғрилар кундуз куни нарвон ёрдамида иккинчи қаватдаги балкон орқали музейга кирган эди.
ДНК далиллари ва видеоёзувларни таҳлил қилиш натижасида расмийлар ўғриликка алоқадор жами 11 нафар гумондорнинг шахсини аниқлади ва уларни қўлга олди. Франция Миллий полициясининг ABC News’га тасдиқлашича, икки гумондор 2025 йилнинг 26 октябрь куни мамлакатдан қочиб кетмоқчи бўлганида ушланган.
Яна беш киши бир неча кун ўтиб Париж атрофларида қўлга олинган. Бундан ташқари тўрт киши деярли бир ой ўтиб, 2025 йилнинг 25 ноябрида ҳибсга олинган. Ҳозирда гумондорларнинг олти нафари ҳибсдан озод қилинган. Қолганлари эса суд жараёнини кутмоқда.
