Ижтимоий тармоқларда курьер ва кўп қаватли уй қоровули ўртасидаги можаро акс этган видео тарқалиб, муҳокамаларга сабаб бўлди. Унда етказиб бериш хизмати ходимига қўриқлаш ходими томонидан жисмоний куч ишлатилгани ва ҳақорат қилингани акс этган. Мазкур ҳолат юзасидан Юнусобод туманлараро судида иш кўриб чиқилди.
Ҳодиса 6 сентябрь куни соат тахминан 14:30 ларда Тошкент шаҳри Юнусобод тумани Боғиравон кўчасидаги кўп қаватли уйлардан бирининг олдида содир бўлган. Судда маълум бўлишича, 20 ёшли курьер навбатдаги буюртмани етказиш учун мазкур манзилга борган. У мижозга қўнғироқ қилиб, буюртмани олиб кетиш учун пастга тушишини кутган.
Курернинг суддаги кўрсатмасига кўра, мижоз буюртмани олиб кетгунига қадар қоровул уни ҳақорат қилган ва бошидаги кепкасини олиб, қайтариб бермаган. Шунингдек, қоровул унинг қанча пул топиши ҳақида ҳақоратли тарзда гапирганини айтган. Курьер воқеани видеога олаётганини билдирганидан кейин ҳам тортишув давом этган.
Қоровул эса курьернинг бинога кирганини ўз вазифасини бажариш жараёнида тўхтатишга уринганини айтган. Эркакнинг сўзларига кўра, у курьерга мижозга телефон қилиб, ташқарида кутишини тушунтирган. Бироқ курер бошқа яшовчилар билан бирга бинога кириб кетган. Шундан сўнг жаҳли чиқиб, курерга қаттиқ гапирганини ва сўкканини тан олган.
Судда томонларнинг кўрсатмалари тингланган. Ҳолат юзасидан қоровулга нисбатан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилиб, иш судга юборилган.
20 июль куни Тошкентнинг Учтепа туманида йўл-транспорт ҳодисасидан сўнг ҳайдовчи скутердаги курьерга тарсаки туширгани ҳақида хабар берилганди. Ҳолат бўйича маъмурий иш расмийлаштирилиб, материаллар судга юборилган.
