Сенегал терма жамоасининг январь ойида мезбон Марокашга қарши ўтган Африка Миллатлар Кубоги финали натижаси бўйича берган апелляция шикояти 8 октябрь куни Спорт арбитраж судида кўриб чиқилади.
Жума куни Спорт арбитраж суди мазкур эшитувлар Лозаннадаги қароргоҳда ёпиқ эшиклар ортида ўтишини маълум қилди. Якуний ҳукм қачон эълон қилиниши ҳозирча белгиланмаган, чунки одатда ҳакамларга қарор чиқариш учун бир неча ой вақт талаб этилади.
Шикоят устида ишлаш жараёни Жаҳон чемпионати давомида ҳам давом этган. Маълумот учун, ушбу мундиалда Марокаш чорак финалга қадар етиб борган бўлса, Сенегал 1/16 финалда Бельгияга имкониятни бой берганди.
Эслатиб ўтамиз, Рабатда бўлиб ўтган шов-шувли Африка Кубоги финалининг қўшимча бўлимларида Сенегал 1:0 ҳисобида ғалаба қозонган эди. Ўйин охирида Марокаш фойдасига пенальти белгилангач, сенегаллик футболчилар норозилик билдириб, майдонни тарк этган ва ўйин 15 дақиқага тўхтаб қолган (кейинчалик ушбу пенальти қайтарилган). Бир неча ҳафтадан сўнг эса Африка футбол конфедерацияси апелляция қўмитаси Сенегални майдонни тарк этгани учун айбдор деб топиб, чемпионликни Марокашга олиб берган. Ушбу ҳукм ҳакамнинг майдондаги қарори якуний эканлигини таъкидловчи футбол қоидаларига зид эканлиги айтилмоқда.
