Марокаш суди Африка Миллатлар Кубоги финал учрашуви вақтида тартибсизликлар келтириб чиқарганликда айбланган 18 нафар сенегаллик ишқибозга нисбатан чиқарилган ҳукмни ўз кучида қолдирди.
Ишқибозлар 18 январь куни қўлга олинган эди. Улар ҳуқуқ-тартибот идоралари ходимларига нисбатан зўравонлик қилиш, спорт жиҳозларига шикаст етказиш ва буюмларни улоқтиришда айбланган.
Суд жараёнининг биринчи босқичида тўққиз нафар сенегаллик бир йилга қамалган ва 5 000 марокаш дирҳами (тахминан 460 евро) миқдорида жаримага тортилганди. Олти нафар мухлисга олти ойлиқ қамоқ ва 2 000 дирҳам (184 евро) жарима, яна уч киши эса уч ойлик қамоқ ва 1 000 дирҳам (92 евро) жарима жазоси қўлланилган. 13 апрель куни айбланувчиларнинг суд қарори устидан шикоят суди ўтказилди, бироқ ҳукм ўзгаришсиз қолди.
18 март куни Африка футбол конфедерацияси (CAF) финал учрашувида сенегалликларга техник мағлубият ёзди ва Марокаш терма жамоасини турнир ғолиби деб эълон қилди. Ўйин натижаси (0:0, қўшимча вақтларда 1:0) Сенегал футболчилари майдонни 10 дақиқадан кўпроқ вақтга тарк этгани сабабли бекор қилинган.
Иккинчи бўлимга қўшиб берилган вақтда, видеотакрордан сўнг сенегалликларнинг голи бекор қилинган, сўнгра яна бир VAR текширувидан кейин Сенегал дарвозасига пенальти белгиланган эди. Шундан сўнг жамоа бош мураббийи Папа Тиау норозилик белгиси сифатида футболчиларни майдондан олиб чиқиб кетди. 15 дақиқадан сўнг сенегалликлар қайтишди, дарвозабон Эдуар Менди эса Браим Диас томонидан 11 метрлик нуқтадан йўлланган зарбани қайтарди. Қўшимча вақтда сенегаллик Папа Гее гол уришга муваффақ бўлганди. Сенегал футбол федерацияси CАФ қарори устидан Спорт ҳакамлик судига (CAS) шикоят киритган.
