АҚШ президенти Дональд Трамп Эрон яна ўт очишни тўхтатиш режимини бузса, Вашингтон Теҳронга қарши ҳарбий амалиётларни кенгайтириши мумкинлигини маълум қилди. Бу ҳақда у Truth Social ижтимоий тармоғидаги саҳифасида ёзди деб хабар бермоқдахабар бермоқда Anadolu агентлиги.
Трампнинг баёноти АҚШнинг Эрон ҳудудидаги айрим ҳарбий объектларга берган зарбаларидан сўнг янгради. Оқ уй бу ҳужумларни Эроннинг Ҳормуз бўғозида тижорий кемаларга ҳужум қилгани ва ўт очишни тўхтатиш режимини яна бир бор бузгани билан изоҳлади.
“Шундай вақт келиши мумкинки, биз энди вазминликни сақлаб қола олмаймиз ва муваффақиятли бошлаган ишимизни ҳарбий йўл билан охирига етказишга мажбур бўламиз. Агар шундай бўлса, Эрон энди мавжуд бўлмайди”, деди Трамп.
АҚШ президенти америкалик ҳарбийлар Эроннинг ракета ва учувчисиз учиш аппаратлари (дронлар) сақланаётган омборларига, шунингдек, қирғоқ радиолокация станцияларига зарба берганини маълум қилди. Трампнинг фикрича, Теҳрон ушбу воқеалардан ҳам тегишли хулоса чиқармайди.
Аввалроқ, АҚШ қуролли кучлари Марказий қўмондонлиги (CENTCOM) Эроннинг Ҳормуз бўғозидаги тижорий кемаларга ҳужумларини сабаб қилиб кўрсатган ҳолда мамлакат ҳудудидаги бир қатор нишонларга зарба берганини маълум қилган эди.
Ўз навбатида Эрон 28 июнь куни АҚШнинг авиазарбаларига жавобан Кувайт ва Баҳрайнга ҳужумлар уюштирди. Эрон Ислом инқилоби қўриқчилари корпуси (ИИҚК) қўшма операцияларда ракета ҳамда дронлардан фойдаланган.
