Бундан 10—11 йил илгари Малайзиянинг Куала Лумпур шаҳридаги аэропортда уч нафар ўзбекистонлик наркотик моддалар билан ушланиб, ўлим жазосига ҳукм қилинган. Бу ҳақда истеъфодаги Давлат хавфсизлик хизмати ходими Ўктам Сувонов YouTubeʼдаги “Xavfsizlik.uz” каналига берган интервьюсида маълум қилди.
Унинг эслашича, Малайзия суди томонидан ўзбеклардан икки аёл ва бир эркакка нисбатан осиш орқали ўлдириш жазоси қўлланган.
“Мен уларни бу жиноятга қай даражада алоқадорлигини аниқлаш, имкон қадар ёрдам бериш учун икки томонлама шартномалар асосида Куала Лумпур шаҳрига учдим. Кейин бир ўрмон ичида жойлашган қамоқхонага бордим. Жуда аянчли аёллар қамоқхонаси эди. Камерага кириб, ўлим жазосига ҳукм қилинган ўзимизнинг фуқароларни кутдим. Эшик очилиб, битта онахонни олиб келишди. Тасаввур қилинг, 56 ёшда. Қўл ва оёғида кишанлар, боши эгилган. Шундай мени кўрди-ю, кўзларидан ёш оқди. Биринчи гапи биласизми нима деди? “Менинг ҳаётимда охирги кўраётган ватандош ўзбегим сиз бўлсангиз керак”, деди. Ўтирдик, гаплашдик, дейди собиқ ходим.
Ўктам Сувонов ҳикоя қиларкан, қамоқдаги аёл берган маълумотларни айтиб ўтган. Воқеа аёллардан бирининг қизи чет эл фуқаросига турмушга чиққанидан бошланган. Тўйдан кейин орадан маълум вақт ўтиб, қиз Ўзбекистонда яшаётган онасига Малайзияда бепул дам олиб кетишни таклиф қилган.
Онаси қўшнисини олган. Қўшниси ҳам 54 ёшли аёл бўлган. Тасаввур қилинг, у бир умр уйда ўтириб, ногирон қизига қараган. Ўшанда қизи 25 ёшда экан. “Қўшни юринг, бизга саёҳат пулини тўларкан”, деяпти. Такси хизмати кўрсатаётган таниш йигитни оляпти. Учови хурсанд бўлиб Тошкентга келяпти. Энди учиб кетиш керак бўлган пайти, бир йигит келиб, уларга учта бўш чамадон беряпти. “Мана бу чамадонга нарсаларингизни жойлаб, учиб кетасизлар”, деяпти. Улар нима бўлаётганини тушунмаган. Чамадонни олиб, нарсаларини жойлаган ва самолётда Куала Лумпур шаҳрига борган”, дейди у.
Ўктам Сувонов сўзларига кўра, аэропортда уларни ҳеч ким кутиб олмайди. У томонга, бу томонга юравериши ортидан аэропорт хавфсизлик хизмати эътиборини тортади. Кейин ходимлар йўловчилар чамадонни очиб қараган пайтда ҳар биридан 4 килодан метамфетамин таблеткаси, яъни синтетик гиёҳвандлик чиқади.
“Кимдан олдинг, деб сўраган, билмайман деган. Ким олиб келиб берди, дейилса, билмаслигини айтган. Айбсиз айбдорлар ва ўлим жазоси”, дейди собиқ ходим.
Ўктам Сувонов Малайзиядаги қамоқхонага борган пайтида иккинчи аёл билан ҳам гаплашганини айтди.
Ўшанда шунчалик эзилганманки, тасаввур қилиш қийин. Айтганимдек, у ёл 25 йил давомида уйда ўтириб, ногирон боласини тарбиялаган, ўстирган. Бир марта, “Юринг, бир дам олиб, ҳаво алмаштириб келасиз, муаммоларингизни сал унутасиз”, деб олиб кетиб, ўлимга олиб боряпти. Хаёлига ҳам келмаган нарса. Тасаввур қиляпсизми, деган собиқ ДХХ ходими.
Суҳбатда Ўктам Сувонов онасини Малайзияга саёҳатга таклиф қилган қизга оид маълумотларни топишга жуда кўп ҳаракат қилганини айтган. Бироқ ходим қиз ким орқали чипта олиб бергани, бу ташрифни қандай ташкиллаштирганини аниқлай олмаган.
