Ўзбекистон миллий терма жамоаси бош мураббийи Фабио Каннаваро Канадага қарши ўтказилган ўртоқлик учрашувидан сўнг матбуот анжуманида иштирок этди. Италиялик мутахассис ўйин даражаси, йўл қўйилган хатолар, жароҳатлар ҳамда бўлажак Жаҳон чемпионатидаги рақиблар ҳақида ўз фикрлари билан ўртоқлашди.
Мураббийнинг таъкидлашича, жамоа биринчи бўлимда талаб қилинган ўйинни кўрсата олган бўлса-да, иккинчи таймда пасайиш кузатилган.
“Ҳар қандай учрашувларда албатта хатолар бўлади. Хатоларни 10 кундан кейинги ўйинларда эмас, айнан мана шундай ўртоқлик ўйинларида қилган яхшироқ. Футбол шундай. Биринчи бўлимда жамоамиз ихчам ва агрессив ўйнади. Иккинчи бўлимда эса тўп назоратини кўпроқ қўлга олишни хоҳладик. Аммо интенсивликни йўқотдик ва бир нечта хатоларга йўл қўйдик. Бундай ўйинларда хато қилсангиз, бунинг учун жазоланасиз.
Футболчиларимдан айнан биринчи бўлимдагидек интенсивликни кутгандим. Мен келганимдан бери юқори интенсивликда ўйнаш устида ишлаяпмиз. Осиё футболи билан халқаро футбол ўртасидаги фарқни яхши биламан. Бу осон эмас, аммо биринчи бўлимда жамоамда кўплаб ижобий жиҳатларни кўрдим”.
Каннаваро учрашувдаги совуқ об-ҳаво шароитига қарамай, стадионга келган мухлисларга алоҳида миннатдорчилик билдирди.
“Юқори интенсивликда ўйнаганда жароҳатлар бўлиб туради. Ҳозирча жиддий нарса йўқ. Эртага ва индинга кўрамиз. Менимча, бугун ҳамма учун энг катта муаммо совуқ об-ҳаво бўлди. Шунга қарамай, кўплаб мухлислар стадионга келишди. Бундай қўллаб-қувватлаш остида ўйнаш биз учун жуда ёқимли бўлди. Бундай стадионда ўйнаш имкониятига эга бўлсангиз, бундан завқланишингиз ва қадрлашингиз керак”.
Мутахассис олдинда кутиб турган ЖЧ—2026 гуруҳ босқичидаги рақиблар даражасига ҳам тўхталиб ўтди.
“Португалия, Колумбия ва Конго жуда кучли жамоалар. Улардан иккитаси дунёнинг энг кучли терма жамоалари қаторига киради. Улар билан ўйнаш жуда қийин бўлишини биламиз. Аммо футболчиларимга ҳам айтдим: бизда йўқотадиган ҳеч нарса йўқ. Бу мамлакатимиз тарихидаги илк Жаҳон чемпионати. Шунинг учун уларга фақат битта нарсани айтаман — бундан завқланинг. Жаҳон чемпионатида ўйнаш имконияти ҳар доим ҳам насиб этавермайди”.
Каннаваро ҳимоячи Абдуқодир Ҳусановнинг ўйинига баҳо берар экан, унинг устунликлари ва устида ишлаши керак бўлган жиҳатларини санаб ўтди.
“Ҳусанов жуда яхши футболчи. У ўз ўйинини янада ривожланиши керак, чунки унинг салоҳияти жуда юқори. Баъзан ҳаддан ташқари агрессив бўлиб кетади, ҳозир эса вазиятларни яхшироқ ўқишни ўрганиши керак. Аммо ҳимоячи сифатида у жуда ҳам яхши футболчи”.
Маълумот учун, Ўзбекистон терма жамоаси ўртоқлик учрашувида Канадага мағлуб бўлди. Эдмонтон шаҳридаги “Commonwealth” стадионида ўтказилган баҳсда майдон эгалари 2:0 ҳисобида ғалаба қозонди.
