2026-йилги футбол бўйича Жаҳон чемпионатининг гуруҳ босқичи 1-туридан ўрин олган АҚШ ва Парагвай терма жамоалари ўртасидаги баҳс ниҳоясига етди. “SoFi” стадионида кечган учрашувда мезбонлар ишончли ҳисобда ғалаба қозонди — 4:1.
Ўйиннинг 7-дақиқасида парагвайликлар футболчиси Дамиан Бобадилла ўз дарвозасига тўп киритиб қўйди. Натижада, америкаликлар олдинга чиқиб олди. Биринчи бўлимнинг 31 ҳамда 45+5-дақиқаларига келиб, мезбонлар вакили Фоларин Балогун дубль қайд этиб, ҳисобни йириклаштиришга муваффақ бўлди. Учрашувнинг 73-дақиқасида Парагвай терма жамоаси аъзоси Маурисио гол уриб, орадаги фарқни қисқартирди. Аммо ўйин якунига яқин АҚШ ҳисобни яна йириклаштирди. Гол муаллифи — Жованни Рейна.
Ушбу натижадан сўнг АҚШ терма жамоаси ўз ҳисобига 3 очко ёздириб қўйди ва “D” гуруҳида пешқадамга айланди. Парагвай эса ҳозирча очкосиз қолмоқда. Гуруҳдаги иккинчи ўйин эса 14 июнь тонгида бўлиб ўтади. Унда Туркия терма жамоаси Австралия билан куч синашади.
Жаҳон чемпионати
“D” гуруҳи, 1-тур
АҚШ — Парагвай 4:1
Голлар: 1:0 — Бобадилла (7, автогол), 2:0 — Балогун (31), 3:0 — Балогун (45+5), 3:1 — Маурисио (73), 4:1 — Рейна
Эслатиб ўтамиз, футбол бўйича жаҳон чемпионати 11 июндан 19 июлгача АҚШ, Канада ва Мексика яшил майдонларида бўлиб ўтади. Мусобақанинг амалдаги чемпиони — Аргентина терма жамоаси ҳисобланади. 2022-йилги мундиал финалида аргентиналиклар Франция билан куч синашиб, пенальтилар сериясида (4:2) ғалаба қозонган эди.
