Афғонистонда сўнгги 48 соат ичида тинмай ёғаётган кучли ёмғир ва тошқин камида 24 кишининг ҳаётига зомин бўлди. Бу ҳақда мамлакат расмийлари ва Фавқулодда вазиятлар бошқармасига таяниб Arab News хабар берди.
Сўнгги сутканинг ўзида тошқинлар сабабли мамлакат шимолидаги Бағлон вилоятида 15 киши, шимоли-шарқдаги Бадахшонда икки киши ва марказий Вардак вилоятида бир киши ҳалок бўлди. Бадахшонлик маҳаллий расмий эса вилоятда икки киши қурбон бўлгани, яна икки нафар фуқаро бедарак йўқолганини маълум қилди. Шунингдек, бу ерда 100 дан ортиқ турар жой бинолари бутунлай вайрон бўлган.
Афғонистоннинг катта қисмида 20 майдан бери кучли ёмғир ёғмоқда. Бу эса кўплаб вилоятларда тошқинларни келтириб чиқарди. 21 май куни ҳам мамлакатнинг бир қанча ҳудудларида яна олти киши ҳалок бўлган эди.
“Ўтган 24 соат ичида олти киши шаҳид бўлди, 11 нафар фуқаро эса жароҳатланди”.
Мамлакатда беқарор ва бўронли об-ҳаво март ойининг охиридан буён давом этмоқда. Ноқулай об-ҳаво сув тошқинлари ва кўчкиларга сабаб бўлиб, уйларга ҳамда қишлоқ хўжалиги экинларига жиддий зарар етказди. Апрель ойидаги тошқинлар ва ёмғирлар оқибатида бутун мамлакат бўйлаб камида 148 киши ҳалок бўлиб, 137 киши тан жароҳати олган эди.
Афғонистонда тез-тез ҳалокатли тошқинлар, кўчкилар ва бўронлар содир бўлиб туради. Бу ҳолат, айниқса, инфратузилмаси жуда заиф бўлган чекка ҳудудларда кўп кузатилади. Кўп йиллик урушлар сабабли дунёдаги энг камбағал давлатлардан бирига айланган Афғонистон иқлим ўзгариши оқибатларига энг кўп дучор бўлмоқда. Олимларнинг таъкидлашича, айнан иқлим ўзгариши бундай кескин ва аномал об-ҳаво ҳодисаларини келтириб чиқармоқда.
