Ўқувчиларни ёзги таътил кунларида назорат қилиб бориш бўйича ўқитувчилардан кафолат хати талаб қилинаётгани рад этилди.
Мактабгача ва мактаб таълими вазирлиги ахборот хизмати раҳбари Дилфуза Собирова бу борада ота-оналар билан ҳамкорлик қилиш бўйича умумтаълим мактаблари синф раҳбарларидан кафолат хати олиш юзасидан ҳудудий бўлинмалар ва таълим муассасаларига ҳеч қандай кўрсатма ёки тавсия берилмаганини маълум қилди.
Ижтимоий тармоқларда кафолат хати намунаси тарқалиб, турли муҳокамаларга сабаб бўлганди.
Унда синф раҳбари ўзи раҳбарлик қилаётган ўқувчиларни қаттиқ назоратга олиши, ҳар хил ўтиришлар, пул йиғимлари қилишларига йўл қўймаслигини кафолатлаши кўрсатилган. Уларнинг ота-оналаридан кафолат хатлари олиши, таътил вақтида мунтазам алоқада бўлиб туриши келтирилганди.
Вазирлар Маҳкамаси қарори билан тасдиқланган “Умумий ўрта таълим тўғрисида”ги низомга кўра, мактабларда ёзги таътил охирги босқичли назорат синови ўтказилган кундан (босқичли назорат ўтказилмайдиган синфлар учун ўқув йили тугаган кундан кейинги кундан) бошлаб 1 сентябргача давом этади.
