АҚШ Конгрессидаги ўнлаб демократлар президенти Дональд Трампни лавозимидан четлатишга чақирди. Бунга АҚШ раҳбарининг 7 апрель кунги баёноти, жумладан, Эроннинг “бутун бир цивилизациясини” йўқ қилиш билан таҳдид қилгани сабаб бўлди. Бу ҳақда Axios хабар берди.
70 дан ортиқ қонунчи, жумладан, бир неча сенатор, импичмент ва Конституциянинг 25-тузатишини қўллаш имкониятларини муҳокама қилмоқда. Мазкур тузатиш президент ўз вазифаларини бажара олмайдиган ҳолатда уни ҳокимиятдан четлатишни назарда тутади.
Бундай чақириқ билан биринчилардан бўлиб Конгресс аъзоси Яссамин Ансари чиқди. У “25-тузатиш бежизга киритилмаган”ини айтиб, Америка ҳарбийлари, Эрон халқи ва глобал хавфсизлик тизими хавф остида эканини таъкидлади.
Конгресснинг яна бир аъзоси Илҳан Умар эса Трампни “мувозанатни йўқотган телба” деб атаб, уни зудлик билан лавозимидан четлатишга чақирди.
“Бунга йўл қўйиб бўлмайди. Конституцияга киритилган 25-тузатишни қўлланг. Импичмент эълон қилинг. Лавозимидан четлаштиринг. Бу мувозанациз телбани мансабидан четлатиш керак”, деди у.
Трампнинг “бутун бир цивилизацияни йўқ қилиш” билан таҳдид қилганидан сўнг яна бир қатор демократлар ҳам бу талабларга қўшилди. Конгресс аъзолари Марк Покан, Рашида Тлаиб, Диана ДеГетт, Шри Танедар ва Сидней Камлагер-Дав 25-тузатишни қўллашга чақирди. Шу билан бирга, Илҳан Умар, Никема Уильямс ва Делиа Рамирес каби қонунчилар ҳамда сенатор Эд Марки импичмент тарафдори эканини айтди.
Конгресс аъзоси Сара Макбрайд эса “Трамп кетиши керак”лигини айтиб, республикачиларни “бу ноқонуний урушга чек қўйиш учун барча конституциявий ваколатлардан фойдаланишга” чақирди.
Демократ Сет Магазинерга кўра, президент атрофидагилар “унинг ҳаракатлари тобора хавфли ва олдиндан айтиб бўлмайдиган бўлиб бораётганини англаб етиши керак”. Демократ Бетти Макколлум эса президент маҳкамаси “буни эътиборга олиши лозим”лигини қўшимча қилди.
Axios маълумотларига кўра, демократлар импичмент бўйича овоз беришдан тортиб, Вазирлар маҳкамасига 25-тузатишни қўллаш талаби билан мурожаат қилишгача бўлган эҳтимолий чораларни муҳокама қилмоқда. Айни пайтда бу масала ҳали партия раҳбарияти даражасига чиқмаган.
Маълумот учун, Эронга таҳдидлардан сўнг Трамп Покистон воситачилигида АҚШ Эрон билан 12 кунлик оташкеским сулҳига эришилганини айтди. Теҳрон мазкур давр мобайнида Ҳормуз бўғозидан кемалар ҳаракатланишига тўсқинлик қилмайди.
АҚШ ва Эрон сулҳи ортидан 8 апрель куни нефть нархи тушди. Лондондаги ICE биржасида Brent нефтьининг бир баррели нархи 94,8 долларгача (ўтган кунга нисбатан -14,8 фоиз) пасайди. Американинг WTI нефтьининг бир баррели эса 96,6 долларга (-15,7 фоиз) баҳоланмоқда.
