Тошкент шаҳар ҳокимлиги пойтахт бозорларида кимёвий бўёқлар билан ишлов берилган помидорлар оммавий сотилаётганини рад этди.
Маълум қилинишича, ижтимоий тармоқларда шу ҳақда хабарлар тарқалгач Тошкент шаҳар Санитария-эпидемиологик осойишталик ва жамоат саломатлиги бошқармаси ходимлари томонидан пойтахтдаги барча озиқ-овқат бозорларида ҳолат ўрганилди. Текширув якунларига кўра, кимёвий бўёқлар билан ишлов берилган сабзавотлар сотилаётгани ҳолатлари аниқланмади.
Ҳокимлик фаол фуқаролик позицияси ҳамда озиқ-овқат маҳсулотлари хавфсизлиги масалаларига эътибори учун аҳолига миннатдорлик билдирди.
Шу билан бирга маълумотларни тарқатишдан олдин ваколатли органлардан аниқлаштириш лозимлигини, нотўғри маълумотларни тарқатиш қонунчиликка мувофиқ жавобгарликка сабаб бўлиши мумкинлигини эслатди.
