БАА минтақада уруш бошланиши ортидан жорий этилган авиапарвозлар бўйича чекловларни бекор қилди. Бу ҳақда маҳаллий WAM агентлиги хабар берди.
Маълум қилинишича, ҳаво навигацияси тизими тўлиқ тикланган, вақтинчалик эҳтиёт чораларининг барчаси бекор қилинган. Расмийлар парвозлар хавфсизлигини таъминлаш учун вазиятни реал вақт режимида кузатишда давом этади.
Мамлакатда авиақатновларга чекловлар 28 февраль куни АҚШ ва Исроилнинг Эронга қарши ҳужумлари бошланиши билан жорий этилганди. Уруш давомида БАА аэропортлари бир неча бор Эрон дронлари ҳужумига учради. Жумладан, 7 март куни Дубай аэропортига дрон зарба берди, 17 март куни шу аэропорт ҳудудида портлаш ва ёнғин қайд этилди.
БАА парвозларга қўйилган чекловларни бекор қилгани ҳақидаги хабар Дональд Трамп Эрон билан уруш “якунлангани”ни эълон қилгач, янгради. АҚШ раҳбари Конгрессга йўллаган мактубида 7 апрелдан бери ўт очиш тўхтагач, “зарбалар алмашилмагани” шунинг учун жанговар ҳаракатлар якунланган деб ҳисобланиши мумкинлигини айтган.
