Тошкент вилояти Оҳангарон шаҳрида ички ишлар органи ходимини асоссиз равишда педофилияда айблаб, ёлғон ахборот тарқатган 18 ёшли йигит қамалди. Бу ҳақда 2 май куни ИИББ матбуот хизмати хабар берди.
Йигит ижтимоий тармоқларда видео жойлаб, ходимни вояга етмаган қизнинг номусига тегганликда айблаган. Кейин у ҳолатга аниқлик киритиш мақсадида ички ишлар биносига чақиртирилган. Фуқаро ходимлар қонуний талабига бўйсунмай, бино ҳудудида жанжал кўтарган.
Ўтказилган суриштирувлар давомида йигит интернетда тарқатган маълумотлари ёлғонлигини тан олган.
Суд қарорига кўра, мазкур шахс ва унинг икки нафар шеригига нисбатан Маъмурий жавобгарлик тўғрисидаги кодекснинг 183, 194 ва 195-моддалари асосида етти суткадан маъмурий қамоқ жазоси тайинланган.
Қайд этилишича, ҳолат юзасидан текширувлар давом этмоқда. Фуқарога нисбатан ички ишлар ходимини қасддан обрўсизлантириш, интернет орқали ёлғон ахборот тарқатиш ҳамда транспорт воситасига шикаст етказиш ҳолатлари бўйича қўшимча тергов ҳаракатлари ўтказиляпти.
