Эрон миллий терма жамоаси 2026 йилги Оаҳон чемпионатида иштирок этади. Бу ҳақда FIFAнинг Ванкувердаги конгрессида ташкилот раҳбари Жанни Инфантино маълум қилди.
“Албатта, Эрон терма жамоаси Жаҳон чемпионатида қатнашади. Жамоа АҚШда ўйнайди. Сабаби оддий: одамларни бирлаштириш учун бизга бирдамлик керак. Бизнинг масъулиятимиз айнан шундан иборат. Дунё футбол орқали бирлашади”, деди Инфантино.
Маълумот учун, 11 март куни Эрон спорт вазири Аҳмад Дунямоли жамоа мундиалда иштирок этмаслигини эълон қилган эди. Бироқ, 16 март куни Осиё футбол конфедерацияси бош котиби Виндзор Жон Эрон томонидан мусобақада қатнашишдан воз кечиш борасида ҳеч қандай билдиришнома келмаганини таъкидлаган.
Кейинчалик Эрон футбол федерацияси президенти Меҳди Тож терма жамоа мундиални бойкот қилмаслигини, аксинча, ташкилот FIFA билан ўйинларни Мексикага кўчириш масаласини муҳокама қилаётганини билдирди. Инфантино эса ўз навбатида Эроннинг турнирда иштирок этишига умид қилишини ва FIFA жамоа учун энг яхши шароитларни яратишга ҳаракат қилишини айтиб ўтган.
21 апрель куни Дунямоли хавфсизлик чоралари тўлиқ таъминланган тақдирда терма жамоанинг иштироки эҳтимоли бор экани, бироқ якуний қарор ҳали қабул қилинмаганини билдирган. 23 апрель куни Ислом Республикаси ҳукумати вакили Фотима Моҳажераний Эрон терма жамоаси Жаҳон чемпионатига тайёргарлик кўраётгани ва унинг мусобақадаги иштироки учун барча чоралар кўрилаётганини эълон қилди.
Режага кўра, Эрон терма жамоаси гуруҳ босқичидаги барча учта ўйинни АҚШда ўтказиши керак. Жамоа Бельгия, Миср ва Янги Зеландия билан бир гуруҳдан жой олган. Жаҳон чемпионати 11 июндан 19 июлга қадар АҚШ, Мексика ва Канадада бўлиб ўтади. Мусобақада илк бор 48 та жамоа иштирок этади.
Аввалроқ, Эрон делегацияси Ванкувер шаҳрида бўлиб ўтадиган FIFA конгрессида иштирок этмаслиги, делегация аъзоларининг мамлакатга кириш рухсатномаси бекор қилингани хабар берилган эди.
Эрон футбол федерацияси президенти Меҳди Тож ва бош котиб Ҳедаят Момбейни ОФК ҳамда FIFA конгрессларида қатнашиш учун Канадага етиб келган. Бироқ улар Торонто аэропортида иммиграция хизмати ходимларининг қаршилигига учраган.
Канаданинг Жамоат хавфсизлиги вазири Гари Анандасангари ҳам Инқилобий гвардия аъзолари мамлакатда хуш кўрилмаслигини таъкидлаган.
