Эрон терма жамоаси делегациясининг бир қисми, жумладан мураббийлар штаби вакиллари 2026 йилги футбол бўйича Жаҳон чемпионати олдидан АҚШ визасини ололмади. Бу ҳақда мамлакатнинг Туркиядаги Эрон элчихонаси баёнот берди.
3 июнь куни Эроннинг Туркиядаги элчиси Муҳаммад Ҳасан Ҳабибуллоҳзода терма жамоа футболчилари мундиалда иштирок этиш учун визалар олганини маълум қилган эди. 6 июнь куни эса АҚШнинг Туркиядаги элчиси Том Баррак Эрон терма жамоаси футболчилари ва ёрдамчи ходимларига ҳам визалар берилганини билдирди.
Бироқ Эрон элчихонаси бу баёнотни рад этиб, делегациянинг муҳим қисми виза ололмаганини таъкидлади.
“Нега терма жамоа раҳбариятининг катта қисми, мураббийлар штаби аъзолари, техник маслаҳатчилар ва миллий жамоанинг ажралмас қисми бўлган бошқа шахсларга виза берилмагани ҳақида гапирмаяпсиз?” дейилади элчихона баёнотида.
Эрон томони буни қасддан амалга оширилган камситувчи муносабатнинг энг юқори даражаси деб баҳолаган.
Эрон терма жамоаси гуруҳ босқичидаги учала учрашувини ҳам АҚШда ўтказиши керак. Жамоа Бельгия, Миср ва Янги Зеландия билан бир гуруҳдан жой олган.
24 май куни FIFA Эрон терма жамоасининг Жаҳон чемпионатидаги базасини АҚШдан Мексикага кўчиришга рухсат берган эди.
2026 йилги Жаҳон чемпионати 11 июндан 19 июлгача АҚШ, Мексика ва Канадада бўлиб ўтади. Мусобақа тарихида илк бор унда 48 та терма жамоа иштирок этади.
