Бразилия президенти Луис Инасиу Лула да Сильва Португалия бош вазири Луиш Монтенегро билан учрашувда футбол бўйича бўлажак жаҳон чемпионати ҳақида қизиқарли суҳбат қурди. Бразилия етакчиси 2026-йилги турнирни 1966-йилдаги тарихий рақобат билан қиёслади.
Президент ўз нутқида бундан 60 йил муқаддам ўтган чемпионатни ёдга олди. Ўшанда Эйсебио бошчилигидаги Португалия терма жамоаси таркибида Пеле бўлган Бразилияни турнирдан чиқариб юборган эди.
“2026 йил биз учун жуда муҳим, чунки бу жаҳон чемпионати йили. Бу менга 1966-йилги мусобақани эслатиб юборди. Умид қиламанки, АҚШда ўтадиган турнирда Португалия икки давлат ўртасидаги тотувликни ҳисобга олади. Криштиану Роналду ва унинг жамоаси Винисиус Жуниор ҳамда Бразилия термасини мағлуб этишга уринмайди деб умид қиламан”, дея ҳазиллашди Лула да Сильва.
Бунга жавобан Португалия бош вазири Монтенегро: “Биз буни финалда амалга оширишимиз мумкин”, — деб киноя қилди.
Лула да Сильва эса суҳбатга якун ясар экан, кулар экан шундай қўшимча қилди: “Агар шундай бўладиган бўлса, бу давлатларимиз ўртасида тиклаб бўлмас ихтилофга сабаб бўлиши мумкин”.
Маълумот учун, 2026-йилги жаҳон чемпионати АҚШ, Канада ва Мексика мамлакатларида бўлиб ўтади. Мусобақанинг ҳал қилувчи баҳслари 11 июлдан 19 июлга қадар ўтказилиши белгиланган.
