Украина президенти Владимир Зеленский Яқин Шарқдаги вазият дунё эътиборини Украинадаги урушдан чалғитаётганини таъкидлади. У бу ҳақда CNN телеканалига берган интервьюсида маълум қилди.
Зеленскийга кўра, Украинадаги жанговар ҳаракатларни тўхтатиш бўйича саъй-ҳаракатларни фақат Эрондаги можаро якунлангач, тиклаш мумкин, деган қараш “катта хавф” ҳисобланади.
АҚШ билан техник музокаралар давом этаётган бўлса-да, Зеленский “Эрон масаласи ёпилмагунча” юқори даражадаги учрашув ўтказиш имконини кўрмаяпти. У АҚШ махсус вакили Стив Уиткофф ва Жаред Кушнер бир вақтнинг ўзида ҳам Эрон, ҳам Украина бўйича музокаралар олиб бораётганини “муаммо” деб баҳолади.
Украина президенти АҚШнинг Яқин Шарқдаги вазиятга эътибор қаратишини тушунишини айтди. Бироқ уруш давом этаётган Украинани унутмаслик муҳимлигини таъкидлади.
Украина ҳақида бир оз кейинроқ гаплашамиз...деб бўлмайди. Украина — бу “бир оз кейинроқ” дейдиган мавзу эмас. Украина аллақачон катта фожиани бошдан кечирмоқда, биз бу билан параллел равишда шуғулланиш йўлини топишимиз керак, деди у.
Зеленский, шунингдек, Эрондаги можаро сабаб Украинага айрим муҳим қуроллар, айниқса, ракетага қарши мудофаа тизимлари етказиб берилиши тўхтаганини билдирди. Киев АҚШдаги ишлаб чиқариш қувватлари чеклангани боис бу воситаларни етарли миқдорда ололмаяпти.
Февраль охирида Россия ва Украина ўртасида ҳудудий масалалар бўйича музокаралар тўхтаб қолди. Айнан шу вақтда Эрон билан боғлиқ можаро АҚШ музокарачилари эътиборини чалғитди. Россия ўт очишни тўхтатиш учун Донбасс устидан тўлиқ ҳуқуқий назоратни талаб қилмоқда. Зеленский эса тинчлик эвазига ҳудудий ён босиш эҳтимолини рад этиб, буни “катта хато” деб атаган.
Сўнгги маълумотларга кўра, Украина Туркиядан Россия президенти Владимир Путин билан учрашувни ташкиллаштиришни сўраган. Зеленский Россия ва Беларусьдан ташқари ҳар қандай давлатда Путин билан учрашишга тайёр.
