Эрон ўзининг савдо кемасига қилинган ҳужумга жавобан Украинанинг Қора денгиздаги портларидан бирига ракета зарбаси беришни режалаштирган. Бу ҳақда The New York Times нашри Эрон ва Ғарб расмийларига таяниб хабар берди.
Манбаларнинг билдиришича, Эрон рамзий маънода ва кичикроқ зарар етказиш учун кичик жанговар каллакка эга баллистик ракетадан фойдаланмоқчи бўлган. Теҳрон расмийлари ушбу жавоб зарбасидан сўнг низо якунланади деган умидда бўлган. Аммо Ғарб мулозимлари Украинанинг жавобини олдиндан айтиш қийинлигидан огоҳлантирган.
Якунда дипломатик саъй-ҳаракатлар туфайли вазият юмшатилган. Эрон ва Россия ўртасидаги иттифоқ сабаб Теҳроннинг Украинага қарши ҳар қандай ракета учириши вазиятни кескинлаштириб, катта уруш хавфини келтириб чиқарган бўларди.
Каспий денгизидаги ҳодиса
26 июль куни Эрон Ташқи ишлар вазирлиги Украинани Каспий денгизида Эрон савдо кемасига ҳужум қилганликда айблади. Ҳужум сабаб кемада портлаш юз берган. Оқибатда бир нафар денгизчи ҳалок бўлган, яна бири жароҳат олган.
Шундан сўнг Украинанинг Теҳрондаги муваққат ишлар вакили Эрон ТИВга чақиртирилиб, унга кескин эътироз билдирилган. Икки кун ўтиб, Эрон ташқи ишлар вазири Аббос Ароқчи украиналик ҳамкасби Андрей Сибига у билан боғланганини айтди. Сибига Эрон кемасига берилган зарба қасддан қилинмагани ва Украина вазиятни кескинлаштиришни хоҳламаслигини билдирган.
“Эрон ҳам вазиятнинг кескинлашувини истамайди. Аммо фуқароларимизга ёки манфаатларимизга қилинган ҳар қандай ҳужумга чидаб бўлмаслигини аниқ билдирдик. Етказилган зарарлар қопланиши керак”, деган Аббос Ароқчи вазиятни изоҳлаб.
Февраль ойида бошланган уруш бошида АҚШ томонидан Эроннинг Форс кўрфазидаги портлари блокада қилинганди. Шу сабабли Эроннинг Каспий денгизи орқали Россия билан савдо қилиши жуда муҳим бўлиб қолган. Ҳозирда Каспий денгизи Эрон ва Россия ўртасидаги ошкора ҳамда яширин савдо учун энг муҳим таъминот йўлига айланган.
