Англия Премьер Лигасининг 34-тури доирасида “Манчестер Сити” сафарда “Бёрнли” устидан минимал (1:0) ҳисобда ғалаба қозонди. Ушбу муваффақият жамоага жорий мавсумнинг илк туридан буён илк бор турнир жадвалида биринчи ўринга кўтарилиш имконини берди.
Учрашувдаги ягона гол Эрлинг Ҳоланд томонидан киритилди. Норвегиялик ҳужумчи 5-дақиқада рақиб дарвозасини ишғол қилиб, “шаҳарликлар”га муҳим 3 очко тақдим этди.
Ўзбекистон терма жамоаси ҳимоячиси Абдуқодир Ҳусанов учрашувни асосий таркибда бошлаб, тўлиқ 90 дақиқа майдонда ҳаракат қилди. Флашсcоре портали ўзбекистонлик ҳимоячининг ўйиндаги ҳаракатларини 7,8 балл билан баҳолади.
Айни дамда Хосеп Гвардиола шогирдлари ва Лондоннинг “Арсенал” клуби ҳисобида 70 тадан очко мавжуд. Қизиғи шундаки, ҳар икки жамоанинг тўплар нисбати ҳам бир хил — +37. Бироқ “шаҳарликлар” рақибига қараганда кўпроқ гол урганликлари (66 га 63) эвазига пешқадамликни қўлга киритишди.
Эътиборли жиҳати шундаки, бор-йўғи бир неча тур аввал “канонирлар” асосий таъқибчисидан 8 очко олдинда бораётган эди. Кетма-кет икки ўйиндаги мағлубият, жумладан, “Манчестер Сити”га қарши кечган ўзаро баҳсдаги омадсизлик Лондон клубининг катта устунлигини йўққа чиқарди.
Англия Премьер Лигаси
34-тур
“Бёрнли” — “Манчестер Сити” 0:1
Голлар: 0:1 — Ҳоланд (5)
