“Манчестер Сити”нинг собиқ ҳимоячиси Колин Ҳендри ўзбекистонлик футболчи Абдуқодир Ҳусановнинг ўйинига юқори баҳо берди. Унинг фикрича, Ҳусанов тез орада дунёнинг энг гранд клублари, жумладан, “Реал Мадрид” эътиборига тушиши мумкин.
Натан Аке ва Жон Стоунз ёзги трансферлар ойнаси вақтида жамоани тарк этиши кутилаётган бир пайтда, Абдуқодир клубнинг асосий ҳимоячисига айланиши мумкин. У нафақат жисмоний курашларда, балки техник маҳоратда ҳам ўзини кўрсата олди. Шу боис кўплаб мутахассислар уни “янги авлоднинг энг кучли ҳимоячиси” деб атамоқда.
“У ‘Челси’га қарши дебютида хатога йўл қўйган эди, аммо ўшандан бери ҳар бир ўйинда ажойиб ўйин кўрсатмоқда. У кучли истеъдод эгаси. ‘Реал’, ‘Барселона’ ёки ‘Бавария’ каби клублар унга қизиқиш билдириши табиий, бироқ уни ‘Манчестер Сити’дан олиб кетиш унчалик осон бўлмайди”.
Гарчи ОАВда миш-мишлари кўпаяётган бўлса-да, “Манчестер Сити” раҳбарияти, хусусан, спорт директори Уго Виана Ҳусановни “тегиб бўлмас футболчи” деб ҳисоблайди. Футболчининг амалдаги шартномаси 2029-йилнинг июнига қадар амал қилади. Клуб унинг жорий мавсумдаги ажойиб ўйинларини инобатга олиб, шартнома шартларини янада яхшилаш ниятида.
Маълумот ўрнида, Англия Премьер Лигада турнир жадвалида “Арсенал” 76 очко билан етакчилик қилмоқда. “Сити” эса етакчи “канонирлар”дан 5 очко ортда қолмоқда, бироқ улар ҳисобида битта захира ўйин бор.
