АҚШ президенти Дональд Трамп FIFA ташкилотидан АҚШ миллий жамоаси ҳужумчиси Фоларин Балогунга кўрсатилган қизил карточкани қайта кўриб чиқишни сўраганини тасдиқлади, бироқ якуний қарорга таъсир ўтказмаганини таъкидлади.
“Мен шунчаки вазиятни қайта кўриб чиқишларини сўрадим. Уларга буни қилишга мажбурсизлар, демадим”, деди Трамп Оқ уйда бўлиб ўтган тадбирларнинг бирида.
Президент FIFA раҳбари Жанни Инфантинога қўнғироқ қилганини ҳамда Калифорниянинг Санта-Клара шаҳрида Босния ва Герцеговинага қарши кечган учрашувдаги (2:0) жазо борасида қайта кўриб чиқишни сўраганини айтиб ўтди. Аммо унинг таъкидлашича, Балогунни бир ўйинга дисквалификация қилиш бўйича мажбурий жазони бекор қилиш якуний қарорини FIFA’нинг ўзи қабул қилган. Натижада футболчига Бельгияга қарши Сиэтлда ўтган нимчорак финал баҳсида майдонга тушишга рухсат берилганди.
FIFA’нинг бу қарори АҚШда ижобий қабул қилинган бўлса-да, халқаро спорт жамоатчилигининг кескин эътирозига сабаб бўлди. Бельгия футбол федерацияси америкалик ҳужумчининг ўйинда иштирок этишига қарши чиққан бўлса, УЕФА бу ҳолатни “тушунарсиз ва оқлаб бўлмайдиган” қадам деб атади.
Трамп ҳакамнинг қизил карточка кўрсатиш қарорини “даҳшатли хато” деб атади. Унинг фикрича, жорий Жаҳон чемпионатида 3 та гол билан жамоа тўпурари бўлиб турган Балогун Бельгияга қарши ўйинда иштирок этмаганида ва АҚШ мағлуб бўлганида, бу турнир учун қора доғ бўлиб қоларди. Шунингдек, президент жазони тўхтатиб тургани учун FIFAдан миннатдорлигини билдирди.
“Буни қоидабузарлик деб ўйламайман. Шунчаки икки ажойиб спортчи ўзаро тўқнашиб кетди”, деди Трамп.
Спортни “жуда яхши” тушунишини айтган президент, аввалига қизил карточка нима эканини ва у қандай оқибатларга олиб келишини билмаганини тан олди. Футболчи бир ўйинга четлатилишини эшитгач эса, вазиятга аралашишга қарор қилган. Бундан ташқари, у видеотакрорлар тизимини ҳам танқид қилиб, секинлаштирилган кадрлар ҳаракатларни янада тажовузкор қилиб кўрсатишини таъкидлади.
Эслатиб ўтамиз, мазкур учрашувда Бельгия 4:1 ҳисобида ғалаба қозониб, АҚШни Жаҳон чемпионатидан чиқариб юборди.
