Тошкент вилоятидаги уйда ташкил этилган яширин омбордан сифати кафолатланмаган ва ноқонуний айланмага киритилган дорилар топилди. Бу ҳақда Давлат хавфсизлик хизмати хабар берди.
ДХХ ва Божхона идоралари ҳамкорлигида ўтказилган тезкор тадбирда Тошкент вилоятининг Тошкент туманида истиқомат қилувчи, 1991 йилда туғилган шахс ўз яшаш хонадонида хориждан айланма йўллар орқали олиб келинган дори воситаларини сақлаб, пойтахтдаги дорихоналарга сотиш билан шуғулланиб келгани аниқланган.
Омборни кўздан кечириш давомида жами 119 турдаги, 3 356 қутида бўлган 76 318 дона Frotu, Budenofalk, Gaviscon, Baraclude ва бошқа номдаги дори воситалари аниқланиб, процессуал тартибда расмийлаштириб олинди. Уларнинг дастлабки умумий қиймати тахминан 1 млрд сўмни ташкил этади.
Ҳозирда дори воситаларидан намуналар олиниб, экспертиза ўтказиш учун Фармацевтика маҳсулотлари хавфсизлиги марказига юборилди. Ҳолат юзасидан терговга қадар текширув ҳаракатлари давом этмоқда.
Аввал аниқланган яширин омборлар
Февраль ойида Тошкентдаги хонадонда сифат сертификатига эга бўлмаган 3 миллиард сўмлик дори воситалари яширин омбори ташкил қилингани аниқланиб, бу дорилар савдоси билан шуғулланувчилар фаолиятига чек қўйилганди. Март ойида Наманган ва Самарқанддаги яширин омборларда истеъмолга яроқсиз минглаб дорилар сотилаётгани аниқланганди.
