Энергетика бозорларини остин-устун қилиб юборган уруш бошланганига бир ойдан ошган ва Ҳормуз бўғози ёпиқ бир пайтда, Ироқ Сурия ҳудуди орқали юк машиналарида хом нефть экспорт қилишни бошлади.
OPEC ташкилотининг асосчиларидан бири бўлган Ироқ ўз бюджет даромадларининг қарийб 90 фоизида нефть экспортига боғланиб қолган. АҚШ ва Исроил зарбаларига жавобан Эрон Ҳормуз бўғозини ёпиб қўйгунга қадар, Ироқ ўз нефтининг асосий қисмини айнан шу йўналиш орқали экспорт қилар эди.
Минтақадаги бошқа экспортчи давлатлар каби Ироқ ҳам муқобил йўналишларни қидиришга мажбур бўлди. Мамлакат Нефть вазирлиги 1 апрель оқшомида қўшни Сурия орқали танкер-юк машиналарида нефть экспорти бошланганини тасдиқлади. Сурия томони нефтнинг ўз ҳудуди орқали хавфсиз ўтишини таъминлашга ваъда берди. Вазирлик экспорт ҳажми “аста-секинлик билан” ошириб борилишини қўшимча қилди.
Ироқ нефть секторидаги манбанинг AFP агентлигига маълум қилишича, экспортнинг дастлабки босқичи доирасида режалаштирилган 299 та юк машинасидан 178 таси Ўрта Ер денгизи соҳилидаги Банияс порти заводига етиб борган.
“Ушбу турдаги илк юк партияси қўшни Ироқдан Ат-Танф чегара пункти орқали кириб келди. Нефть ташувчи машиналар Банияс терминалида бўшатилади ва кейинги экспорт учун танкерларга юкланади”, дея тушунтириш берди Сурия давлат нефть компанияси матбуот котиби Сафван Шайх Аҳмад.
Март ойида Ироқ Туркиянинг Жайҳан порти орқали кунига 250 минг баррел миқдорида чекланган нефть экспортини қайта тиклаганини эълон қилган эди.
