Россиянинг нефть экспорти жорий йил май ойида суткасига ўртача 3,46 миллион баррелни ташкил этди. Бу 2022 йилдан буён қайд этилган энг юқори кўрсаткич ҳисобланади. Бу ҳақда Bloomberg агентлиги хабар берди.
Нашрнинг ёзишича, Москва жаҳон бозорига нефть етказиб бериш ҳажмини фаол равишда оширмоқда.
Bloomberg ҳисоб-китобларига кўра, йил бошидан буён Россия суткасига ўртача 3,46 миллион баррел нефть экспорт қилган. Бу 2025 йилги кўрсаткичдан қарийб 120 минг баррелга кўп бўлиб, Россия Украинага бостириб кирган 2022 йилдан кейинги барча йиллик ўртача кўрсаткичлардан юқори.
Агентлик танкерлар ҳаракати ҳақидаги маълумотларга таяниб, 31 майгача бўлган тўрт ҳафта давомида хом нефть етказиб бериш ҳажми суткасига ўртача 3,64 миллион баррелни ташкил этганини қайд этди.
Эрон билан боғлиқ уруш ва Ҳормуз бўғозидаги вазият туфайли жаҳон нефть нархлари ошган. Натижада Россия экспортининг қиймати 2022 йил февралидан бери кузатилган энг юқори даражадан бирига етган.
Нашрнинг ёзишича, сўнгги тўрт ҳафта ичида Россиянинг кунлик нефть экспорти биринчи чоракдаги кўрсаткичлардан қарийб 300 минг баррелга юқори бўлган.
Шунингдек, денгизда ташилаётган Россия нефти ҳажми 124 миллион баррелга етган. Бу апрель ойи ўрталаридаги энг паст кўрсаткичдан тахминан 25 фоиз кўпдир.
Танкерларни кузатиш маълумотлари ушбу нефтнинг деярли барчаси харидорларга етказиб бериш жараёнида эканини, яъни денгизда бекор турмаганини кўрсатмоқда.
Франция 31 май куни Атлантика океанида санкцияга тушган Россия нефть танкерини қўлга олган эди. Кремль ушбу “ноқонуний” мусодарани “халқаро қароқчиликка яқин ҳаракат” деб баҳолаганди.
