Польшада фаолият юритаётган компаниялар 3,6 мингдан ортиқ ўзбекистонлик мутахассисларни ишга жалб этишга тайёрлигини билдирди. Бу ҳақда “Дунё” хабар берди.
Маълум қилинишича, Ўзбекистон элчихонаси томонидан мамлакатнинг меҳнат ресурслари салоҳиятини тарғиб қилиш ҳамда Польша компаниялари билан ҳамкорликни кенгайтиришга бағишланган тақдимот тадбири ўтказилган. Унда Grupa Progres, Gremi Personal, Personnel International каби 20 дан ортиқ етакчи рекрутинг ва иш берувчи компаниялар вакиллари иштирок этди.
Музокаралар давомида полшалик иш берувчилар ўз эҳтиёжларини очиқлади. Хусусан, логистика соҳасига 2000 нафар, хизмат кўрсатиш йўналишига 800 нафар, саноат тармоғига 600 нафар ҳамда қурилиш соҳасига 200 нафар мутахассис кераклиги қайд этилди.
Тадбирда сўзга чиққан компания ва ташкилот вакиллари Ўзбекистонни истиқболли ҳамкор сифатида баҳолади. Уларнинг таъкидлашича, Польша иқтисодиёти доимий ишчи кучига муҳтож бўлиб, Ўзбекистон бу борада ишончли манба сифатида кўрилмоқда. Шунингдек, марказий осиёлик, хусусан ўзбекистонлик ишчиларга талаб юқори экани ва виза тартибларини соддалаштириш муҳимлиги қайд этилди.
Учрашув якунида Ўзбекистон Миграция агентлиги ҳамда аккредитациядан ўтган бандлик ташкилотлари иштирокида B2B форматидаги навбатдаги музокараларни ўтказиш бўйича келишувга эришилди. Бу эса фуқароларнинг Польшада хавфсиз ва тартибли меҳнат фаолиятини йўлга қўйишга хизмат қилиши кутилмоқда.
Аввалроқ Миграция агентлиги ва Япониянинг Proud Partners компанияси ўзбекистонлик ҳайдовчиларни юк етказиб берувчи сифатида ишга таклиф қилгани ҳақида хабар берилганди. Юк етказиб берувчи ҳайдовчи сифатида ишлаш учун 200 та иш ўрни мавжуд бўлиб, 1200-2000 долларгача ойлик маош берилади.
