Ўзбекистонлик аралаш яккакураш устаси Богдан Гусков UFC турнирида россиялик Магомед Анкалаевга қарши ўтказиладиган жанги ҳақида фикр билдирди. Бу ҳақда MMA Junkie нашри хабар берди.
“Бундай хушхабарни қабул қилиш учун менга ортиқча вақт керак эмас. Менежерим Магомед билан жанг қилиш имконияти борлигини айтганида, ‘балки, бу жанг фаолиятим ва ҳаётимни ўзгартириб юборар’, дедим. Биз ўқув-машғулот йиғинини уч раундлик жангга мослаб тузган эдик. Беш раундли тўқнашувда қандай бўлишини кўрамиз — мен биринчи марта бу форматда жанг қиляпман”, деди Гусков.
Шунингдек, спортчи Анкалаевни ярим оғир вазн тоифасидаги энг кучли рақиб деб атаган.
“Анкалаевга қарши октагонга кўтарилиш Блахович билан жангдан кўра қизиқарлироқ. Магомед рейтингда пешқадамлик қиляпти. Бу менинг аслида ким эканимни кўрсатиб берувчи ўзига хос синов. Ёшим 33 да, энди ортиқ кута олмайман. Менга фақат рақиб номи ва манзил керак, холос”, дея таъкидлади у.
Эслатиб ўтамиз, ушбу яккакураш оқшоми (UFC Fight Night) 25 июль куни БААнинг Абу-Даби шаҳрида бўлиб ўтади.
