Кенияда ҳашаротлар контрабандаси билан боғлиқ ҳолатлар кўпаяётган бир пайтда, Найроби аэропортида юклари орасида 2 200 тадан ортиқ тирик чумолини яширган эркак ушланди. Бу ҳақда кўздан кечирган суд ҳужжатларига таяниб Reuters хабар берди.
27 ёшли Хитой фуқароси Жанг Кечун 10 март куни Жомо Кенятта халқаро аэропортида мамлакатни тарк этишга уринаётган вақтда қўлга олинган. Иммиграция хизмати ходимлари Жангнинг паспортида тўхтатиш буйруғи борлигини аниқлаган. Маълум бўлишича, у 2025 йилда Кенияда ҳибсга олинишдан қочиб қутулган.
Чумоли ишқибозлари бу ҳашаротларнинг мураккаб ижтимоий тузилиши ва хатти-ҳаракатларини кузатиш учун формикариум деб аталадиган йирик шаффоф идишларда бутун бошли колонияларни сақлайди ва бунинг учун катта маблағ сарфлайди.
Экспертларнинг таъкидлашича, Кенияда биоқароқчилик (табиий бойликларни ўғирлаш) йўналиши ўзгарган: эндиликда жиноятчилар фақат фил суяги каби анъанавий ўлжалар билан чекланмай, экотизим учун муҳим бўлган камроқ машҳур турларга ҳам қизиқиш билдирмоқда.
Худди шунга ўхшаш воқеа 2025 йилда ҳам кузатилган эди. Ўшанда минглаб чумолиларни олиб чиқишга уринган тўрт кишининг ҳар бирига 7 700 доллар миқдорида жарима қўлланган эди.
Терговчиларнинг маълум қилишича, Жангнинг юклари кўздан кечирилганда жами 2 238 та чумоли топилган. Улардан 1 948 таси махсус тест найчаларига жойланган, қолган қисми эса учта юмшоқ қоғоз ўрамига яширилган.
Жанг Кенияда икки ҳафта бўлганини ва унга ҳашаротларни етказиб берган уч нафар шериги борлигини тан олган.
Кения Ёввойи табиатни муҳофаза қилиш хизмати суддан терговни якунлаш, жумладан, Жангдан мусодара қилинган iPhone ва MacBook қурилмаларини текшириш учун қўшимча вақт сўради.
Бундан ташқари, 10 март куни Бангкокда ҳам айнан Кениядан юборилган шундай чумолилар партияси тўхтатиб қолинган. Бу ҳолат кенг тарқалган ва уюшган халқаро контрабанда тармоғи мавжудлигидан далолат бермоқда.
