Австралиядан бошпана олган Эрон аёллар терма жамоаси футболчиларидан бири ўз ватанига қайтишга қарор қилган. Бу ҳақда BBC нашри хабар берди.
Аввалроқ беш нафар эронлик футболчи Австралия полицияси ёрдамида жамоа қароргоҳидан қочиб кетган эди. Уларга гуманитар визалар берилган. Кейинчалик жамоанинг яна икки аъзоси — футболчи Моҳаддесеҳ Золфи ва мураббийлар штаби вакили Заҳро Султон Мешкеҳ Кар Австралияда қолиш истагини билдирган.
“Ўтган кеча қолишга қарор қилган икки аёлдан бири мамлакатни тарк этган баъзи жамоадошлари билан гаплашиб, фикридан қайтди. Австралияда одамлар ўз қарорларини ўзгартиришлари мумкин. Биз у ушбу қарорни қабул қилган вазиятни ҳурмат қиламиз. Расмийларимиз бу унинг шахсий қарори эканлигига ишонч ҳосил қилишди ва ҳозир сиз бермоқчи бўлган барча саволлар унга ҳам берилди”, деди Австралия иммиграция вазири Тони Берк.
Унинг сўзларига кўра, жамоадошлари ва мураббийи ушбу футболчига Эрон элчихонасига мурожаат қилишни маслаҳат берган. Бунинг оқибатида Эрон расмийлари Австралияда қолишга қарор қилган бошқа спортчиларнинг қаерда эканлигидан хабар топган.
“Мен дарҳол уларни бошқа жойга кўчириш бўйича кўрсатма бердим ва бу иш кечиктирмасдан амалга оширилди”, дея таъкидлаган вазир.
2 март куни Эрон аёллар терма жамоаси Австралияда ўтказилган Осиё Кубогидаги илк учрашувини ўтказган эди. Ўйин олдидан миллий мадҳиянинг янграши вақтида футболчилар жим турган, айримлари эса табассум қилган.
Спортчиларнинг бу ҳаракати Эрон ҳукуматига қарши норозилик сифатида қилинганми ёки Исроил ва АҚШнинг зарбаларига нисбатан муносабат сифатида амалга оширилганми — ҳозирча аниқ эмас. Бироқ Эронда бу ҳолат ҳукуматга қарши протест сифатида талқин қилинган.
Хусусан, давлат телеканалларидан бирининг бошловчиси Муҳаммад Ризо Шаҳбозий футболчиларни “уруш давридаги хоинлар” деб атаб, уларни “қатъий жазолаш”га чақирган.
Шундан сўнг ҳуқуқ ҳимоячилари ва мухлислар Австралия ҳукуматини спортчиларнинг хавфсизлигини таъминлашга чақирган. Чунки футболчилар учун Эронга қайтиш хавфли бўлиши мумкин.
Инсон ҳуқуқлари фаоли ва Австралия терма жамоасининг собиқ сардори Крейг Фостернинг таъкидлашича, кўплаб футболчиларнинг оилалари Эронда қолган, айримларининг эса фарзандлари ҳам бор. Унинг фикрича, ҳатто уларга Австралияда қолиш таклиф этилган тақдирда ҳам, айрим спортчилар оилавий сабабларга кўра бундан воз кечиши мумкин.
Беркнинг айтишича, Австралияда қолган барча аёлларга доимий яшаш ҳуқуқини тезлаштирилган тартибда бериш режалаштирилган.
Шунингдек, унинг сўзларига кўра, делегациянинг қолган аъзоларига ҳам мамлакатни тарк этишдан олдин Сидней аэропортида яна бир бор Австралияда қолиш таклифи билдирилган.
Берк Сидней аэропортида жуда катта полиция назорати ўрнатилганини ҳам таъкидлади. Унинг айтишича, футболчилар расмийлар билан таржимон орқали яккама-якка суҳбатлашишлари учун кузатувчилардан ажратилган ва уларга ўз оилаларига қўнғироқ қилиш имконияти ҳам берилган.
