Эрон аёллар миллий терма жамоасининг Осиё Кубогидаги иштирокидан сўнг, Австралия ҳукумати футболчиларга мамлакатда қолиш ва бошпана олишни таклиф қилган. Бу ҳақда Эрон футбол федерацияси вице-президенти Фариде Шожайи маълум қилди.
Унинг сўзларига кўра, ушбу жараёнлар АҚШ кўрсатмаси билан амалга оширилган ва футболчиларга аэропортда босим ўтказилган.
“Австралиядан чиқиб кетаётганимизда, аэропортда ҳар бир футболчини алоҳида хонага олиб киришди ва бир нечта таржимонлар ҳамроҳлигида мамлакатда қолишни сўрашди. Улар ҳатто буни АҚШ ҳукуматининг илтимоси деб ҳам айтишган. АҚШ ва Австралия барча футболчиларимизни олиб қолиш учун ҳаракат қилишди, бироқ, хайриятки, спортчиларимиз бу таклифни рад этишган”, дейди Фариде Шожайи Tasnim агентлигига берган интервьюсида.
Мазкур ҳолат юзасидан АҚШ президенти Дональд Трамп ҳам муносабат билдирган. 9 март куни у баъзи эронлик футболчилар Австралия ҳукуматидан бошпана масаласида ёрдам олганини, жамоанинг бир қисми эса ўз ихтиёри билан ватанга қайтишни танлаганини таъкидлади.
Икки кун ўтиб, Австралия Ички ишлар вазири Тони Берк вазиятга ойдинлик киритди. Унинг сўзларига кўра, Австралия беш нафар эронлик футболчига мамлакатда қолиш учун виза беришга рози бўлган. Бироқ улар охирги паллада таклифни рад этиб, жамоаси билан бирга Эронга йўл олган.
