Фавқулодда вазиятлар вазирлиги Қўқондаги уйда бир кишининг ҳалок бўлишига олиб келган газ портлашига нима сабаб бўлганини маълум қилди.
“Мутахассислар томонидан ўрганиш жараёнида аниқландики, ушбу чақнаш содир бўлган хонадонда уй эгаси газ плитасидан фойдаланган пайтда носоз ва ностандарт шлангдан фойдаланган ва бу охир-оқибат ўша катта фожиага сабаб бўлди”, деди вазирлик ахборот хизмати раҳбари Мурод Содиқов.
ФВВ вакили газ аниқловчи анализатор, яъни агар хонага газ сизиб чиқса, манбайини ўчирадиган қурилма ҳақида ҳам маълумот берди. Бу автоматлашган тизим ва энг хавфсиз ҳисобланишини
қайд этди.
Қўқондаги портлаш
“Бўстон” маҳалла фуқаролар йиғини ҳудудида жойлашган кўп қаватли уйда газ портлаши 25 февраль куни содир бўлиб, ёнғин келиб чиққанди. Бахтсиз ҳодиса сабаб мазкур уйда истиқомат қилган, 2007-йилда туғилган фуқаро бетон қоплама (плита) босиб қолиши сабабли оғир тан жароҳати олиб, воқеа жойида вафот этган. Ҳолат юзасидан Жиноят кодексининг 259-моддаси 2-қисми “а” банди (ёнғин хавфсизлиги қоидаларини бузиш одам ўлишига сабаб бўлиши) билан жиноят иши қўзғатилиб, жиноят иши Тергов департаменти томонидан назоратга олинди.
