UFC ярим ўрта вазн тоифаси чемпиони Ислом Махачев навбатдаги жангини эквадорлик Майкл Моралесга қарши ўтказади. Жанг 12 июль куни Лас Вегас шаҳрида ўтадиган Халқаро жанглар ҳафталиги доирасида ташкил этилади.
26 ёшли Моралес UFC ярим ўрта вазн рейтингида учинчи ўринни эгаллаб турибди. Эквадорлик жангчи профессионал фаолиятида 19 та жанг ўтказиб, барчасида ғалаба қозонган. У сўнгги бор 2025 йил ноябрь ойида ўтказилган UFC 322 турнирида Шон Брейдини нокаут эвазига мағлуб этган эди.
Махачев эса ушбу оқшомнинг марказий жангида UFC ярим ўрта вазн чемпионлик камари учун Жек Делла Маддалена устидан ғалаба қозонган. 34 ёшли доғистонлик спортчи MMA’даги фаолияти давомида 28 ғалаба ва 1 мағлубият қайд этган.
Аввалроқ, Исломнинг менежери Али Абдулазиз UFC промоушени ярим ўрта вазн тоифасининг амалдаги чемпиони учун катта тўқнашув тайёрлаётганини маълум қилган эди.
Агар ушбу маълумотлар тасдиқланса, Махачев йилнинг энг кутилган мусобақаси — UFC Оқ уй турнирида иштирок этмайди.
