“Ўзбекистон почтаси” АЖ 2026 йил 1 мартдан бошлаб йўл ҳаракати қоидаларини бузганлик учун ЙҲХХ Жамоат хавфсизлик департаменти томонидан шакллантириладиган маъмурий баённомалар — жарима хатларини етказиб бериш хизмати тўхтатилишини маълум қилди.
Қайд этилишича, хизмат кўрсатишнинг тўхтатилишига Ички ишлар вазирлигининг “Хавфсиз шаҳар” тизимларини ривожлантириш давлат муассасаси билан 2026 йил учун шартнома имзоланмагани сабаб бўлган. Шу боис мазкур йўналишдаги почта жўнатмалари қабул қилинмайди ва етказилмайди.
“Ўзбекистон почтаси” АЖ мазкур масала юзасидан қўшимча тафсилотлар эълон қилиниши билан жамоатчиликка маълум қилиб борилишини билдирди.
Ички ишлар вазирлиги ҳолат юзасидан муносабат билдириб, жарима хатларини етказиб бериш тўхтатилишини тасдиқлади. Идора “Хавфсиз шаҳар“ концепцияси доирасида қарорларнинг кўчирма нусхаси ва унга илова қилинган материаллар синов тариқасида қуйидаги манбалар орқали юборилиши йўлга қўйилганини билдирди:
- давлат хизматлари портали: my.gov.uz (МйГов мобил иловаси);
- СафеРоад мобил иловаси;
- Роад24 мобил иловаси;
- Ягона интерактив давлат хизматлари мобил иловаси (МИБ).
- Ҳамроҳ мобил иловаси қарор расмийлаштирилиши билан 6079 рақамидан SMS-хабарнома юборилади.
Агар SMS-хабарнома келмаса, my.gov.uz порталига кириб, телефон рақамингизни рўйхатдан ўтказиш лозим — шундан сўнг барча хабарномалар автоматик равишда юборилади.
Мазкур рақамли хизматлардан фойдаланиш вақти чекланмаган, қўшимча рўйхатдан ўтиш ёки ҳужжат тақдим этиш талаб этилмайди, қарор расмийлаштирилиши билан бир вақтда барча материаллар билан танишиш ҳамда қонунчиликда белгиланган муддатларда жаримани тўлаш имконияти мавжуд.
