“Барселона” футбол клуби раҳбариятга нисбатан билдирилган молиявий жиноятлар ҳақидаги айбловлар юзасидан расмий баёнот берди. Аввалроқ, клуб мухлисларидан бири раҳбариятни пул ювиш ва асоссиз комиссия тўловларини амалга оширишда айблаб, судга мурожаат қилгани ҳақида хабарлар тарқалган эди.
Клубнинг маълум қилишича, 15 январь куни бир гуруҳ журналистлар ва коррупцияни ўрганувчи ташкилот (OCCRP) “Барселона” раҳбарияти билан боғланиб, ўзларидаги маълумотлар ҳақиқатга қанчалик яқинлигини аниқлаштирмоқчи бўлган. “Барселона” ўтказган ички ва ташқи таҳлиллар эса ушбу ҳужжатларнинг мутлақо сохта ва қўпол равишда қалбакилаштирилганини кўрсатган. Клуб 19 январь куни журналистларни маълумотлар ёлғонлигидан огоҳлантириб, мақолани чоп этишдан тийилишни сўраган.
Каталонияликлар ушбу ҳолат бўйича қуйидаги чораларни кўришини эълон қилди:
- Ёлғон ҳисобот тақдим этган ва ҳужжатларни қалбакилаштирган шахсларга нисбатан ҳуқуқий чоралар кўрилади;
- Клубнинг Интизом қўмитасига ушбу шахсларга нисбатан энг қатъий жазоларни қўллаш бўйича кўрсатма берилади;
- Ёлғонлигини била туриб, ушбу маълумотларни тарқатган ОАВ вакиллари билан суд орқали ҳисоб-китоб қилинади.
“Барселона” раҳбарияти ушбу можаролар айнан клубдаги сайлов жараёнлари вақтида юзага чиқаётганидан афсусда эканини билдирди. Шунингдек, раҳбарият мазкур можароларни сайлов жараёнларига путур етказиш ҳамда клуб аъзоларини чалғитишга бўлган уриниш деб баҳолаган. Баёнотда таъкидланишича, бундай туҳматлар орқали одамларнинг фикрини нотўғри томонга буриш кўзланган. Қолаверса, клуб барча ОАВ ва сайлов иштирокчиларини тасдиқланмаган ҳамда туҳматга асосланган маълумотларни тарқатмасликка чақирган.
Янада кўпроқ спорт хабарларини @Daryo_Sport24 Telegram-каналида кузатиб боринг.
