“Интер Майами” ҳужумчиси Лионель Месси “Барселона” тарк этгани ҳақидаги хотиралари билан ўртоқлашди. Унга кўра, футболчи карьерасини “Барселона”да якунлашни истаган, аммо бу амалга ошмаган.
“Ҳақиқатан ҳам, биз яхши ва мураккаб даврларни бошдан кечирдик, аммо бу узоқ йиллик фаолият учун табиий ҳолат. Ҳаммаси бир тексда кетган деб бўлмайди, қийин дамлар ҳам бўлади. Мен бошқа клубга ўтмасдан, Каталонияда бутун фаолиятимни ўтказишга тайёр ва Европада фақат ‘Барселона’да ўйнашни истардим.
Афсуски, ҳаммаси бошқача бўлди, лекин бирга ўтказган ҳар бир лаҳзани доимо ёдимда сақлайман. Бунинг учун миннатдорман. Орадан кўп вақт ўтди. Пандемия туфайли мухлисларсиз клубни тарк этишга мажбур бўлдим.
Албатта, қайтаман. Стадионда оддий бир мухлис каби ўйинларни томоша қиламан ва клубга далда бераман. Эҳтимол, АҚШда яна бир неча йил қолишим мумкин, аммо биз оиламиз билан Барселонага қайтамиз, чунки мен ҳар доим айтганимдек, у ер менинг жойим, менинг уйим. Биз Барселонани жуда соғиндик, шунинг учун албатта қайтамиз”, дея Мессининг сўзларини келтиради Sport.es нашри.
Маълумот учун, Месси Каталония клубида 2003–2021-йиллар оралиғида тўп суриб, 778 ўйинда майдонга тушиб, ўз ҳисобига 672 та гол ва 303 та голли узатма ёздириб қўйган. Лионель “Барселона” билан 10 марта Испания чемпиони бўлган, 7 марта Испания Кубогини ва 4 марта Чемпионлар Лигаси совринини қўлга киритган.
“Барселона” 2021-йилда молиявий қийинчиликлар ортидан Месси билан янги шартнома имзоламади. Ундан кейин ҳужумчи Парижнинг “ПСЖ” клубида икки йил ўйнади. 2023-йилдан бери АҚШнинг “Интер Майами” жамоаси шарафини ҳимоя қилади.
