“Барселона” бош мураббийи Ҳанси-Дитер Флик Каталония клуби билан амалдаги шартномасини 2028-йилга қадар узайтиришга қарор қилди. Бу ҳақда Sport.es нашри хабар бермоқда.
Маълум қилинишича, германиялик мутахассис клуб билан келишувга эришган, бироқ расмий эълонни президентлик сайловлари якунлангунига қадар кечиктиришни афзал кўрган. Флик амалдаги президент Жоан Лапортанинг ғалабасига ишонч ҳосил қилганидан сўнггина шартномани имзолашни режалаштирган эди.
Хабарларда айтилишича, мураббий Барселона шаҳридаги ҳаётидан ва клубнинг ёш футболчиларга таянаётганидан тўлиқ мамнун. Фликнинг асосий мақсади — ўзи тарбиялаётган ёш авлод билан биргаликда Чемпионлар Лигасида ғолиб чиқиш.
Эслатиб ўтамиз, айни дамда “Барселона” Испания чемпионатида пешқадамлик қилмоқда. 28-турдан сўнг каталонияликлар 70 очко жамғарган ҳолда, энг яқин таъқибчиси — Мадриднинг “Реал” клубини 4 очкога ортда қолдирмоқда.
