Президент Шавкат Мирзиёев 13 февраль куни Тошкент вилоятининг Оҳангарон туманига ташрифи давомида маиший техника маҳсулотларини ишлаб чиқариш билан шуғулланувчи Premier корхонаси фаолияти билан танишди.
Президент матбуот хизматининг хабар қилишича, Оҳангарондаги мазкур лойиҳа Бирлашган Араб Амирликларининг Fajr Al Mustaqbal General Trading корхонаси билан ҳамкорликда 10 гектар майдонда амалга оширилаётган бўлиб, умумий қиймати 30 миллион долларни ташкил қилади. Лойиҳа доирасида 250 та янги иш ўрни яратилади, 4 миллион доллар экспорт амалга оширилади. Айни вақтда қурилиш ишлари 95 фоизга бажарилиб, 11,3 миллион доллар инвестиция ўзлаштирилган.
Мазкур корхонада ишлаб чиқариладиган маҳсулотлар Озарбайжон, Қозоғистон, Тожикистон, Қирғизистон, Афғонистон, Россия каби давлатларга экспорт қилинади. Айни пайтда бу каби корхона Ўзбекистонда иккита, Марказий Осиёда эса тўртта бўлиб, уларнинг орасида мазкур лойиҳа маҳсулот ишлаб чиқариш ҳажми бўйича иккинчи ўринда туради. Келгусида мажмуа тўлиқ ишга тушишининг ҳисобига 87 миллион долларлик импорт ўрнини босувчи маҳсулот ишлаб чиқарилиши кутиляпти.
Давлат раҳбари корхонанинг иш жараёни, маҳсулотлари сифатини кўздан кечирди. Мутахассислар ва ишчилар билан суҳбатлашди.
Шу ернинг ўзида корхонанинг 2026—2027 йилларга мўлжалланган ривожланиш дастури тақдимот қилинди. Мамлакатдаги электротехника маҳсулотлари ишлаб чиқарувчи корхоналарнинг кўргазмаси билан танишилди.
Давлат раҳбари бундан аввал Оҳангарондаги юқори кучланишли кабеллар корхонаси билан, Vades Group компанияси томонидан амалга оширилаётган юқори технологияли лойиҳа билан, Оҳангарондаги технопаркда мис маҳсулотлари ишлаб чиқариш қувватлари билан танишгани хабар қилинганди.
