Аргентина футбол клуби “Ньюэллс Олд Бойс” 8 карра “Олтин тўп” соҳиби Лионель Мессининг 2027-йилнинг биринчи ярмида жамоага қайтишини таъминлаш устида ишламоқда. Бу ҳақда клуб вице-президенти Хуан Мануэл Медина TN каналига берган интервьюсида маълум қилган.
Медина сўзларига кўра, лойиҳа фақат клуб чегарасида эмас, балки Росарио шаҳри, провинция ва бутун Аргентина футболи даражасида режалаштирилмоқда:
“Биз Мессининг 2027-йилнинг биринчи ярмида ‘Ньюэллс Олд Бойс’ сафида ўйнашини таъминлаш устида ишлаяпмиз, лекин ҳозирча бу бўйича аниқ ҳаракатлар кетмаяпти. Бу лойиҳа нафақат клуб доирасида, балки Росарио шаҳри, провинция ва бутун Аргентина футболи лойиҳаси ҳисобланади. Ҳамма нарса инфратузилма ва рақобатбардош спорт лойиҳасини тақдим эта олишимизга боғлиқ. Биз Мессининг атрофидагилар билан аллақачон дастлабки музокараларни ўтказдик, лекин ҳозирча аниқ қарор йўқ”, дейди Медина.
Месси 38 ёшда. У футболдаги фаолиятини 8 ёшида “Ньюэллс Олд Бойс” академиясида бошлаган, 2000-йилда эса “Барселона” академиясига ўтган. Футболчи “Барселона” сафида 2005–2021 йилларда 10 марта Испания чемпиони бўлган ва 4 марта Чемпионлар Лигаси ғолиби сифатида тарихга кирган.
2021-йилда Месси “Пари Сен-Жермен”га ўтган, Франция клубида икки марта мамлакат чемпиони ва бир марта Суперкубок соҳиби бўлган. 2023-йилдан бери ҳужумчи “Интер Майами” шарафини ҳимоя қилмоқда ва шу йилнинг декабрида MLS чемпионлигини қўлга киритган.
Месси терма жамоа сафида ҳам муваффақиятли фаолият юритган. У Аргентина миллий жамоаси билан икки марта Америка Кубоги (2021, 2024), 2022-йилда эса Жаҳон чемпионлигини қўлга киритган.
