Каталониянинг “Барселона” клуби спорт директори Деку Лионель Мессининг “кўк-анорранглилар” сафига қайтиши мумкинлиги ҳақидаги саволга жавоб берди. Бу ҳақда инсайдер Фабрицио Романо ўзининг X (собиқ Twitter) саҳифасида маълум қилди.
“Мессини қисқа муддатга ижарага олиш? Леонинг ‘Интер Маями’ билан шартномаси бор. Бу ҳақда қачонлардир гап бўлган деб ўйламайман. Месси — ҳар доим Месси. У ҳар доим ўзи ўйнаётган жамоасига нимадир бера олади, лекин ҳозир бу мавзуни муҳокама қилмаймиз”, дея фикр билдирди Деку.
Маълумот учун, аввалроқ ОАВда аргентиналик ҳужумчи 2026 йил АҚШ, Мексика ва Канада майдонларида бўлиб ўтадиган Жаҳон чемпионатига оптимал спорт формасида бориш учун каталонияликлар билан шартнома имзолаши ҳақида хабарлар тарқалганди.
Эслатиб ўтамиз, Месси 2003–2021-йиллар оралиғида “Барселона” шарафини ҳимоя қилган. Аммо 2021-йилда клуб молиявий қийинчиликлар ортидан футболчи билан янги шартнома имзоламади. Шу боис, каталонияликлар Лео билан матбуот анжуманида хайрлашди.
Месси фаолияти давомида 10 марта Испания чемпионлигини, 4 марта Чемпионлар Лигаси ғолиблигини қўлга киритган. Аргентиналик футболчи клуб тарихидаги энг яхши тўпурар ҳисобланади — 672 та гол. Лео 2011/2012-йилги мавсумда Ла Лигада 50 та гол уриб, лига рекордини ўрнатган. 2021-йилда Месси “Барселона”ни тарк этиб, “Пари Сен-Жермен” клубига эркин агент сифатида ўтди. Ҳозирда ҳужумчи АҚШнинг “Интер Майами” жамоаси сафида фаолиятини давом эттирмоқда.
