Англиянинг “Арсенал” ва “Челси” клублари “Реал Мадрид”нинг 20 ёшли ҳужумкор ярим ҳимоячиси Арда Гюлер трансфери учун курашда асосий фаворитларга айланиш устида иш олиб бормоқда. Бу ҳақда Football Transfers хабар берди.
Манбага кўра, Лондон клублари 2026 йилги ёзги трансферлар ойнаси вақтида туркиялик ярим ҳимоячини 90 миллион евро эвазига сотиб олишга уриниб кўриши мумкин. “Реал” Гюлерни сотишни режалаштирмаяпти, бироқ “Арсенал” ва “Челси” ўз таклифлари “қироллик клуби” раҳбарияти қарорини ўзгартиришга мажбур қилиши мумкин, деб ҳисобламоқда.
Жорий мавсумда Гюлер барча мусобақаларда 31 та учрашувда майдонга тушиб, 3 та гол ва 11 та голли узатмага муаллифлик қилган. Футболчининг клуб билан амалдаги шартномаси 2029 йил ёзига қадар мўлжалланган. Transfermarkt порталидаги маълумотларга кўра, футболчининг бозор қиймати 90 миллион еврони ташкил этади.
Аввалроқ “Реал Мадрид” кетма-кет учинчи йил футбол клублари орасида энг юқори даромад кўрсаткичига эга жамоалар рейтингида етакчи бўлгани ҳақида хабар берилганди.
“Реал” 2024/2025 йилги мавсумда 1,161 миллиард евро даромад кўрсаткичига эришди. Бу натижа билан мадридликлар ўтган мавсумдаги 1,046 миллиард евролик кўрсаткични ҳам яхшилаган. Қайд этилишича, “Реал” бир мавсумда 1 миллиард евродан ортиқ даромад топган тарихдаги илк футбол клуби бўлиб қолмоқда.
Шунингдек, рейтингда “Арсенал” 821,7 миллион евролик кўрсаткич билан 7-поғонани эгаллаган. “Челси” эса 584,1 миллион евро билан 10-ўринда жойлашган.
