Сенегал терма жамоаси ва Саудия Арабистонининг “Ан-Насср” клуби ҳужумчиси Садио Мане Африка Миллатлар Кубогида энди майдонга тушмаслигини маълум қилди. 2026-йилги турнир финалида сенегалликлар Марокашни 1:0 ҳисобида мағлуб этган эди. Ушбу ғалаба орқали Мане Африка Миллатлар Кубогини икки бор қўлга киритган футболчига айланди.
“Бу Африка Миллатлар Кубогидаги менинг сўнгги рақсим, афсуски. Бироқ мен ҳар доим Сенегални қўллаб-қувватлайдиган 12-футболчи бўлиб қоламан”, — дейди Мане.
Маълумот учун, Африка Миллатлар Кубогининг навбатдаги турнири 2027-йилнинг август ойида Кения, Танзания ва Уганда давлатларида бўлиб ўтади.
Садио Мане Англиянинг “Ливерпуль” клуби сафидаги ўйинлари орқали кенг танилган. У ушбу жамоа билан Англия чемпиони бўлган ва УЕФА Чемпионлар Лигасида ғалаба қозонган.
33 ёшли Мане фаолияти давомида 614 та учрашувда майдонга тушиб, 249 та гол ва 126 та голли узатмага муаллифлик қилган. Сенегал терма жамоаси сафида эса 124 та ўйинда 52 та гол ва 28 та голли узатмани амалга оширган. У терма жамоа тарихидаги энг яхши тўпурар ҳисобланади. Transfermarkt портали Маненинг бозор қийматини 7 миллион еврога баҳолаган.
