2025 йилда Тошкент шаҳрида жами 1 млн 131,5 минг тонна маиший чиқинди йиғиб олинган. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги “Дарё”га хабар берди.
Қайд этилишича, 2025 йилда Тошкент шаҳрида жами 1 миллион 131 минг тоннадан ортиқ чиқинди йиғиб олинган. Бу ўртача ҳисобда кунига 3—3,5 минг тонна чиқинди тўпланаётганини англатади. Айни пайтда пойтахтда чиқинди хизматидан фойдаланувчи абонентлар сони 755 минг 43 тани ташкил этади. Уларнинг чиқинди хизматлари бўйича қарздорлиги 19 миллиард 919 миллион сўмдан ошган. Чиқиндиларни ҳисобга олиш ва тўловларни назорат қилиш ишлари “Тоза Макон” ягона электрон биллинг тизими орқали амалга оширилмоқда.
Агентлик вакилларининг таъкидлашича, сўнгги йилларда олиб борилган тарғибот-ташвиқот ишлари натижасида нон ва озиқ-овқат чиқиндиларининг улуши сезиларли даражада камайган. Ҳозирда ушбу турдаги чиқиндилар умумий ҳажмнинг 0,1 фоизини ташкил этади. Бу эса Тошкентда бир кунда ўртача 3–3,5 тонна нон ва озиқ-овқат чиқиндиси ташланаётганини кўрсатади.
Брифингда, шунингдек, чиқиндиларни саралаб йиғиш, қайта ишлаш ва энергия олишга йўналтирилган лойиҳалар кенгайтирилаётгани қайд этилди. Мутасаддиларга кўра, пойтахтда ҳосил бўлаётган йирик ҳажмдаги чиқиндиларни самарали бошқариш учун рақамлаштириш ва циркуляр иқтисодиёт тамойилларига асосланган тизимлар изчил жорий этилмоқда.
Шунингдек, брифингда 2025 йил давомида республика бўйича ҳосил бўлган маиший чиқиндилар ҳажмига ҳам тўхталиб ўтилди. Таҳлилларга кўра, йил давомида мамлакатда 15,1 млн тонна маиший чиқинди ҳосил бўлган. Аҳолига кўрсатилган чиқинди хизматлари учун ҳисобланган 1 трлн 454 млрд сўм тўловнинг 90 фоизи ундирилган бўлса-да, умумий дебитор қарздорлик 622,7 млрд сўмни ташкил этмоқда. Шу билан бирга, 211,9 млрд сўмлик нореал қарздорликлар электрон тизимдан чиқарилган.
